حينما سمع كبير الياوران بالضجه التي تحدث بين ملائكة الأدعيه والنذور وطلبات الخلق, أمر بجلبهم مكبلين مقيدين, مكسوري الأجنحه, شابعين كفخات وجلاليق
فقال لهم: وين رئيس قسمكم اسكنجبيل؟؟ وليش ماحاضر وياكم هل اثول؟
فأمر رئيس الأنضباط الألهي, بإحضاره قابضا متصدعا من خشية السافاك!!
فلما أحضروا اسكنجبيل, وقد كان سرمهر فطكوه, قال له كبير الياوران, اسمع ياكلب الملائكه, كيف تسمح لموظفي قسمك بالصراخ والشغب وانت نايم يم ابو العرك, وماهي سبب هذه الهرجه؟؟
فقال اسكنجبيل بلسان فصيح, بعد ان مد جناحه ليستريح, يامولاي, كما تعرف إن قسم الأدعيه والنذور من أهم الاقسام, خصوصا بعد توقف قسم الانبياء عن العمل, وقسم الحسنات اغلق بسبب عزوف خير امة اخرجت للنار – عفوا قصدي للناس- عن العمل الصالح
فبقي قسمنا يعمل بجد ونشاط, ولكن حدث شئ عجيب خلال القرن الماضي
فلقد توقفت معظم أمم الأرض عن الدعاء وطلب المعونه من الخالق عز وجل, وبدأت تعتمد البشريه على نفسها, عدا أمة محمد, فهم لايكفون ولايملون من التوسل والطلب ليل نهار,
وبالأخص هناك بلد اسمه خريطستان, هذا مسويله اني اربع شفتات ليل ونهار يجيبون طلباتهم وماجاي نلحك عليهم, لذلك هلكوا من التعب الموظفين وتعاركوا ويه الباقين
كبير الياوران: وشيطلبون هذوله أهل خريطستان؟
اسكنجبيل: مولاي هاي وحدها مصيبه, مايخلون شي مايطلبوه!! وبيهم سرسريه مايستحون كلش
مولاي أكو واحد يطلب من ربه يزيد رزقه من الرشوه؟؟
لو واحد يطلب من ربه ينام ويه شكره!!
واحد بالبرلمان يندعي يخمطله خمطه ام المليار ويكلب!!
أحلى شي رئيس وزرائهم يطلب يبقه بالحكم ويتحسن الوضع الأمني على ايده!! يعني هاي شلون تصير ماأدري؟؟ لأن أول واحد لازم يتغيير هو!!
هسه لو طالب يحتل استراليا جان معقوله
خو واكعين دك طلبات من أهل البيت
وكلها طلبات تخجل, زواج, طلاق, تريد تحبل, تجيب ولد, إقامه بالسويد, تعيين حتى يقبض رشوه, عبوه ناسفه لجيرانه, مفخخه تشيل باب البنك حتى يحوسم
حتى أهل البيت كالوا احنه معلينه تره, هذوله راح يورطونه ومن وراهم راح نفوت جهنم
مولاي, أحلى شي بيهم, أبد مايندعون يجيبلهم حاكم خوش آدمي!!! ليش ماأدري؟؟؟
كبير الياوران: وأحلى شي إنو ربهم ديحقق كل أمانيهم وطلباتهم, يريد يشوف شراح يصير بيهم
