كل ما تحتاجه هو كلمة صادقة و الإصرار على قولها،

 لو سألتني في ١٤ آذار ٢٠١١ شو عامل بكرة، كنت قلتلك رايح على شغلي باللاذقية و بعدين رح شوف الشباب على دء طاولة و بعدها نتعشى و نرجع عالبيت..
اجا تاني نهار و اتغير كلشي..
فلا شغلي بقا يقبلني لأَنِّي اخدت موقف الأحرار ..
و لا الشباب شفتهون بالليل لأنّو شوارع اللادقية كانت مسكرة بحواجز اللجان الشعبية و مزدحمة بسيارات الامن..
و لا رحنا على عشا و لا غدا و لا سحور بعد ما اتسكّرت كل مطاعم المدينة خوفاً من القادم الجديد..
متلي متل ملايين البشر اللي أخدوا موقف مع الثورة ، شب من ملايين الشباب اللي اخدهون ضميرهون على هالضفة لا بحثاً عن شهرة مؤقتة و لا عن المال وسخ الدنيا..
بدأت بكتابة قصص واقعية عن عائلة الاسد ، دفعت ثمنها الغالي و النفيس و التهجير و التخوين و الاستيلاء على ما تملك عائلتي من إرث عمره يمتد ميّات السنين في اللاذقية ، لا طمعاً بشهرة و لا محبةً بتكديس المال، الشي اللي لمسوا جمهور الثورة و بدأ بالتفاعل مع صفحتي و متابعة كل ما اكتب و أقول ..
بعد سبع سنين من عمر الثورة ، و بعد سبع سنين من تداول اسمي على صفحات الثورة كأحد ابناءها ، بحب قول للساعين الى الشهرة المزيفة :
لا تحتاج الى قضية اغتيال كاذبة ، و لا لإعلان شذوذك ، و لا لفك حجابك على الهواء مباشرة ، كل ما تحتاجه هو كلمة صادقة و الإصرار على قولها، و أعدك بملايين المتابعين و انا أولهم..