كل دمعة بالدعاء انو يلعن روحك يا حافظ

بابتسامة عريضة ، و بلغة عربية مكسَّرة بتحمل كل أصول ضيافة العرب و كرمهم، كان هالشب الأرمني ستيب يستقبل زباينو بهالمقهى الصغير على ناصية ضيقة من شارع بغداد في اللاذقية..
قصص حب اتكللت بالزواج انرسمت على طاولات هالمقهى ، و قصص زواج انتهت بالطلاق من ورا الساعات الطويلة اللي تنقضى على هالكراسي المعدنية الباردة..
اليوم احترق هالمقهى ، و احترقت معو كل شهادات الزواج و الطلاق اللي اتوقعت على طاولاتو .. و احترقت معو كل الأدلة على ساعات الاستغابة و النميمة و فش الخلق اللي قضيناها بين حيطانو..
و لكن شو ضل من ذاكرتنا ما فقدناه لحتى نزعل على شوية حيطان و كم كرسي و تلات طاولات و فنجان قهوة بخمسين ليرة ؟؟
اذا كورنيش اللادقية اللي قضينا كل طفولتنا على رصيفو عملوه مستودعات للمينا..
و اذا كشاف اللادقية اللي ربينا على أصوات قادتو، و اتزيّنت فينا ساحات المدينة خلال استعراضاتنا ، اتسكّر بالشمع الاحمر لتعارض أهدافو مع أهداف منظمة طلائع البعث..
و اذا نادي حطين اللي اتكسّرت رجلينا على ارضية ملعب السلة الباطونية، التغى و اتحوّل لصالة افراح تصلح لمجالس عزاء..
و اذا بحر اللادقية اللي ضجر رملو من خفق رجلينا، طمروه و عملوه مرفأ من جهة ، و مصب مجارير من الجهة التانية..
و اذا صلنفة اللي ما غبنا عنها و لا صيفية بآخر اربعين سنة.. اتقلّع شجرها ، و انطمرت حدائقها ، و اختفى تلجها، و جفّت ميّتها ، و ارتفعت أسوار قصورها اللي احتلوها بيت الاسد و حثالاتهون..
و اذا كسب و تفاحها و نسمتها الباردة اللي اختفت بعد ما احترق شجرها و عملوا سومر الاسد فحم لاراكيل مطاعمها المزينة حيطانها بوحدات التكييف و التبريد..
و اذا مطعم اسبيرو صار بناية قميئة ..
و اذا مسبح فارس راح بتبليط البحر..
و اذا مقهى العصافيري صار عاصمة لبيت الاسد..
و اذا الشاطىء الأزرق صارت دخلتو باتكلفك نص راتبك..
و اذا حديقة البطرني اتحولّت لمرتع للحشاشين و السكرجية..
شو بدي اتذكّر !!!
بحكيلكون عن الرز بحليب عند الطاحونة الحمرا او عن نهفات ابو طارق على باب سينما دمشق، او عن قصص كراج بيروت ، او عن بسطات البنات المتوحمين على نقطة البوليس، او عن مكتبة فكر وفن اللي صارت مخزن لبيع الصرامي ..
ستيب مانو اول ذكرياتنا اللي احترقت اكيد، و لكن اخرها عالاطلاق..
فشو بدي اتذكّر منك يا لادقية من اليوم و رايح ، كل صفنة بغصّة، و كل دمعة بالدعاء انو يلعن روحك يا حافظ على هالابن الكلب اللي خلّفتو..