نورس محمد
لما ننتقد جبهة النصرة لارتباطها بالقاعدة بشبحوا علينا منظرين الجبهة بتلات حجج:
أولا: ٩٠٪ من مجاهدين الجبهة سوريين.
ثانيا: جبهة النصرة أكتر فصيل يؤذي النظام.
ثالثا: حتى لو انفكوا عن القاعدة ما رح تفرق. لانه قوات التحالف مو محتاجة لعذر لضرب السوريين.
أجوبتي على هالحجج:
أولا: بما انه ٩٠٪ من جبهة النصرة سوريين، هاد اهم سبب لفك ارتباط النصرة بالقاعدة. بدنا شبابنا يكونوا ثوار سوريين مو ارهابين القاعدة.
ثانيا: نحنا عم نطلب فك ارتباط النصرة بالقاعدة ماعم نطلب ايقاف قتال النظام. اللي بيعتقد انه فك ارتباط النصرة بالقاعدة رح يأثر على قتالهم للنظام بكون عم يعترف انه اللي عم يقاتل النظام هو القاعدة. وشبابنا بالنصرة عم يقاتلو النظام بعقيدة القاعدة مو بعقيدة السوري الثائر الحر.
ثالثا: فك ارتباط النصرة بالقاعدة بجوز حاليا ماله تأثير على الداخل، ولكن رح يأثر لما يوقف اطلاق النار، ويصير هدف التحالف مطاردة النصرة وسقوط مدنيين شهداء ابرياء بسبب تواجد جهاديين النصرة بين المدنيين.
عم نخسر اخر بقايا الشعوب الواقفة معنا بثورتنا ضد النظام بسبب جبهة النصرة. لما قصفت طائرات الاحتلال الروسي ادلب واستشهدوا ٧٢ سوري. موقع الاندبندنت البريطاني نشر خبر عن الجريمة. وكانت كل تعليقات البريطانيين مؤيدة لضرب ادلب وبعضهم طالبوا بمسح ادلب عن الخريطة لانها تحت سيطرة القاعدة.
عم يأثر على السوريين المهجرين بالخارج، صرنا ارهابيين بنظر كتير من الحكومات الاجنبية. قبل كم يوم الشرطة الفرنسية اعتقلت وضربت شاب سوري بحجة انتمائه لمنظمة ارهابية مع انه الشاب مسيحي.
رح يأثر على شبابنا بجبهة النصرة انفسهم. رح ينحط اسمائهم على قوائم الارهاب ورح يبقوا مطاردين بقية عمرهم. ولما تحرر سوريا رح يكونوا هالشباب محرومين من السفر ليكملوا دراستهم او ليتعالجوا اذا محتاجين علاج ومحرومين حتى من السياحة. وملجأهم الوحيد هو تورا بورا.
طبعا هالشي اللي عم يخططله ويعمل عليه الجولاني. بدو يحول شبابنا لارهابيين بحيث يكونوا مطاردين والحامي الوحيد الهم هو القاعدة. ويبقوا تحت رحمته ويستغلهم بمعاركه القادمة ضد الكفار.
لذلك انا بعتبر كل انسان يهلل ويصفق ويدعم جبهة النصرة هو مجرم بحق شبابنا وشريك الجولاني بتحويل شبابنا الى ارهابيين وتعريض حياتهم ومستقبلهم للخطر. والسوريين اللي برات سوريا الداعمين لجبهة النصرة هم انانيين، بدهم جبهة النصرة تحررلهم سوريا وبعدها طز بالشباب انشالله عمرهن مادرسوا او تعالجوا المهم هنن يقدروا يرجعوا يصيفوا بسوريا بجنسياتهم الاجنبية.
هاد البوست مو للنقاش او التشبيح، هاد فشة خلق لاني خايف على شبابنا بجبهة النصرة متل مالي خايف على كل الثوار السوريين والسكوت على ارتباط جبهة النصرة بالقاعدة جريمة بحق هالشباب.
اللهم اني تعبت وقرفت من هالوضع المقرف.