كلو ع المسلخ … اذا مارفعنا كلنا علم سوريا فقط

Bassam Yousef
الله بلانا بنظام ضل اربعين سنة ينهب ويخرب بالبلد وعباها فساد وطائفية وعشائرية …. ولما وقعت الواقعة ترك الدنيا كلها وعربط بالكرسي… شلحوه البلد وضل معربط بالكرسي … شلحوه تيابو وضل معربط بالكرسي …خوزقوه وضل معربط بالكرسي .
والله بلانا – ليكمل النقل بالزعرور – بمعارضة حطت عينها ع الكرسي … ولما وقعت الواقعة ماعاد شافت عيونهن إلا الكرسي … راحت البلد وعيونهن ع الكرسي … صاروا خدم عند الآخرين منشان الكرسي … مسحوا الأرض بكرامتهن وضلت عيونهن ع الكرسي .
تدمرت بلدنا وخسرنا مايقارب مليون سوري ومتلهن معاقين وتهجرنا وولادنا الهن ست سنين بلا مدارس واللي مفكرين حالهن انو ولادهن عم يتعلموا بمدارس النظام صدقوني صار التعليم بسوريا مسخرة ..لاجامعاتنا جامعات ولا مدارسنا مدارس ومناهجنا صارت متل مناهج العصور الوسطى … ماضل عنا طرقات ولا كهربا ولامي ولامشافي … صارت مليانة سوريا عصابات، والسرقة شغالة على عيون الكل وبيسرقوك بوضح النهار وبياخدو بيتك وبياخدو سيارتك واذا ماعجبك بيحطو رصاصة براسك .
طيب … وبعدين … اللي واقفين مع النظام لوين رايحين ..؟؟.
اللي حيوا على الجهاد وصرعونا انو الاسلام هو الحل ..ماحلكن تبطلوا تتاجروا بالدين ..؟؟.
والله وتلاتة بالله انو الاخوان المسلمين وكل هدول جماعة ( ماجئنا إلا لنصرة هذا الدين ) شركاء نظام الاسد في كارثة سوريا….
ماعاد بدنا نخلص من عصابات النظام وعصابات تجار الدين ؟؟!!.
طيب وبعدين…؟؟ صدقوني كلنا رايحين ع المسلخ علوية وسنية ومسيحية واكراد ودروز و..و..
اللي رافعين علم تركيا واللي رافعين علم روسيا واللي رافعين علم ايران ولا علم حزب الله ولا ..ولا … كلو ع المسلخ … اذا مارفعنا كلنا علم سوريا فقط.