قصتنا ببساطة انّو بدنا رئيس بيشبهنا.. هيدي ثورتنا

خمس سنين كاملة ، و الفصائل المسلحة المسيحية في بيروت مع كتائب فلسطينية مسلحة عم يتبادلو الاستفزازات المهينة في شوارع المدينة..
لحد ما اجا نيسان ١٩٧٥ و صارت حادثة بوسطة عين الرمانة و اتفجّر الصراع في كل لبنان..
أدرك اللبناني بعد كم سنة، انو الحكاية مو قصة بوسطة عين الرمانة ، هيّة قصة قلوب مليانة..
و عندنا بسوريا نفس الشي..
الحكاية مو حكاية أطفال درعا.. هيدي قصة شعب حط راس محل القرعة..
و القصة مو قصة اعتداء على نسوان بساحة الحريقة.. هيدي قصة ناس رنّت عندهون ساعة الحقيقة..
و حكايتنا مو حكاية قلع أضافر.. هيدي قصة شعب ما بقا ينحكم بالحوافر..
و قصتنا مو قصة ابن خالتك عاطف.. هيدي قصة السوري اللي ما بقا منّك خايف..
القصة ابداً مو صراع عالسلطة ، هيدي ثورة شعب بدّو حاكم عادل مو حيوان بيجيب الجلطة..
الحكاية يا حبّاب ، مو حكاية سندويشة كباب ، هيدي قصة أهل بدهون يشوفوا ولادهون صاروا شباب..
قصتنا مو قصة فقر و رغيف ، هيدي قصة شباب مل و هوّة قاعد على قهاوي الرصيف..
حكايتنا يا جحش مو المسيحي عبيروت و العلوي عالتابوت.. حكايتنا خبّرتك ياها رزان و غنّالك ياها الساروت..
قصتنا مو لنشيلك و نجيب واحد متلك يحكمنا.. قصتنا ببساطة انّو بدنا رئيس بيشبهنا..
هيدي ثورتنا