قصة و حكمة من زياد الصوفي..109

القصة:

حكاية اليوم رح تكون شوي غير القصص اللي مرو..هية مجموعة من حكايا لشبيح معين أخد من الشام مركز لألو ..

قصة شبيح قادر اليوم يرعب أكبر ضباط الشام..

شيخ كار التشبيح بسوريا..

شب ضخم و على وجهو دائما علامات الغضب حتى بأسعد لحظاتو..بيمشي بطريقة مميزة جدا ما ممكن ما تلفت نظرك، راسو لقدام بدون ما يحركو لا يمين و لا شمال و بيمشي بسرعة، و إذا عصب بتصيبو حالة من الهيستيريا فبيصير يكسر كلشي حواليه..

ما عندو قيمة لا لرجل دين و لا لرجل سياسة و لا لرجل شرطة، يعني بالسوري الدارج ما عندو كبير إلا الجمل..مهما كان هالجمل و مهما حمل..

شبيح من الدائرة الضيقة لحافظ مخلوف، دائرة باتضم بالاضافة ألو شبيح أقل من مستواه الأجرامي بشوي هوة غاندي أسعد..

مجاهد إسماعيل: شيخ كار التشبيح بالشام اليوم..

جامع الحسن و جامع الرفاعي بيعرفوه كتير منيح..

ابن ضابط متوفي( فؤاد إسماعيل) مقرب من حافظ الأسد، عقيد قائد لواء 21 ميكانيك..

بعد الخدمات الكبيرة اللي قدمها للبائد في مجزرة حماه، ما نسيلو ياها و رقاه لرتبو لواء، و مات بهالرتبة..

مجاهد اتربى على مبدأ: كل أخطاءك مغفورة يا بطل..بدي حياتو شريك لعاصم غسان الأسد بتجارة السيارات اللي كانو يستأجرونها من بيروت و يدخلو فيها على سوريا عن طريق الخط العسكري و يهربوها ليبيعوها بالعراق..

بسنة 2005 ما عادت وفيت معو تجارة السيارات المسروقة، فأنتقل لمرحلة أخطر من التشبيح و بدي بخطف تجار الشام و ابتزاز أهاليهون..

من حوادث الخطف المشهورة بسنة 2006، حادثة خطف تاجر من عيلة صمصالو اللي كان مقرب من بشار، بس ما استرجى يشكيلو خوفا من حافظ مخلوف..

و تاجر تاني اسمو احمد هدايا وكيل مجموعة من الشركات منها جيليت و سوزوكي و أيسوزو..و ما طلع من الرهن إلا لما دفعولو لمجاهد 2 مليون دولار بصلنفة..

انسجن مجاهد أكتر من مرة نتيجة مشاكل كبيرة و كان حافظ مخلوف بكل مرة يطالعو بحجة أنو ما بقا بيعيدا و على مسؤوليتي..

لما بديت الثورة السورية، ما شاف حافظ مخلوف كلب وفي و شاطر بالتشبيح أد مجاهد..فوكلو بمهمة القمع و التشبيح على أهل الشام المنتفضين..

و حقيقة حافظ مخلوف كان على حق، لما اختار مجاهد، اختار شخص بزمانو من قلة ضميرو قوص على شريكو عاصم الأسد بالشام..

فما كان رح يشوف أحسن منو لهيك مهمة..

مهمة مجاهد كانت الروحة على ضيع اللادقية و طرطوس، و تجييش كل الشباب المطلوبين للأمن و بتمويل من آل مخلوف و ذو الهمة عيسى شاليش..

كل مظاهرات الشام بتعرف مجاهد و باصات الشبيحة اللي بيبعتهون..

هوة اللي بعت الشبيح ليضرب المعارض صالحة بسميراميس قدام عدسة كاميرا تلفزيون الدنيا، و هوة اللي اتعرض لمحمد حبش بنفس الاجتماع و سألو قدام كل العالم: مين سمحلكن بهالاجتماع؟؟

فكان رد النائب حبش: أخدنا موافقة شفهية من النائب فاروق الشرع..

فكان رد مجاهد قدام كل خلق الله: ايه كذا من أختك و أخت فاروق الشرع..

و هوة الشبيح اللي كان حاضر بليلة القدر 2011 قدام جامع الرفاعي.. قام بطرد العقيد توفيق يونس اللي باعتو وزير الداخلية يومها مع عناصرو لقمع أي مظاهرة بتطلع بعد الصلاة، و بياخود عنو الشبيح مجاهد مع جماعتو هالدور عالرغم من تدخل محمد حمشو شخصيا بهالموضوع..

حمشو اللي نال الطرد متل العقيد يونس بليلتها و تركو الجامع و المصلين لهالكلب و جماعتو..

لما اتصل العقيد يونس بمجاهد ليخبرو أنو محمد حمشو أكدلو أنو ما رح يصير شي و لا رح يطلعو المصلين مظاهرة، فكان رد مجاهد بصراخ: نحنا اللي رح نحمي البلد مو أنتو يا طنطات و سكر بوجهو التلفون..

اقتحم المسجد و كسرو على راس المصلين تحت مراقبة قوى الأمن الداخلي و العقيد يونس و الحمشو نفسو..

ليلتها كتب مرافقة هالكلب وليد مخلوف على الفيس بوك: أسمعو يا اتباع العرعور.. من نحن.. علويين لا نهاب موتا و لا سجنا و لا سجينا، و لا نخضع إلا لذو الفقار سيف علينا..

و كتب كمان ردا على شبيحة اسمها سوسو: و الله يا سوسو نحنا ما كنا بدنا نوسخ رجلينا بالمسجد، بس على ما يبدو اشتاقت وجوه المصلين لصرامينا..

هيدي كانت نوعية اللي اقتحمو مسجد الرفاعي، بس لحتى حطكون بالصورة..

و كتب عن رحلتهون تاني يوم لمسجد الشيخ سارية الرفاعي ( زيد بن ثابت ):

شووو اليوم، قال فيه كم كلب كآنو معتصمين بجامع زيد بن ثابت!! رحنا.. بس ما شفنا و ما لقينا غير نسوانوهون ما يبوسو صرامينا بعد ما اشتغلت الهريبة عند رجالهون..

هيدي عينة من خريجي مدرسة حافظ مخلوف، و كلبو الوفي مجاهد إسماعيل..

فمين الطائفي، و مين المسلح، و مين المجرم؟؟

منرجع لمجاهد..

لما بيمر بالشعلان مكان أقامتو، كل الجيران بيتجنبو النظر بوجهو من معرفتهون بجنانو ، حتى أصحاب المطاعم اللي بيروح عليها متل سهارى و المشرقة، كان يغط عالبهون لما يدخل هالمناضل..

و أكيد نتيجة كل هالخدمات اللي قدمتها هالعيلة لبيت الأسد، كان لازم يتكافأوو..

طارق إسماعيل ابن عمو هوة قنصل سوريا بمصر عند الشبيح الأكبر السفير يوسف الاحمد زوج روعة الأسد..

زياد إسماعيل، أمين عام جمارك جديدة يابوس..

و فهمكون كفاية شو يعني أمين جمارك..

و من القصص الكتيرة لهالشبيح: اقتحامو لمقهى الروضة بوسط العاصمة دمشق، و اعتداؤو على الفنان سلوم حداد، اللي ما خلصو من موت محقق من الضرب إلا المخرج احمد إبراهيم احمد، اللي استخدم انتماؤو للطائفة الكريمة و بعدو لمجاهد عن رقبة سلوم..

حكيو كتير عن ظاهرة الشبيحة اللي اختفت عأيام بشار الأسد.. هادول عينة حقيرة، مانهون مشايخ جبل هالمرة، مجرد خفافيش الليل و الأزقة..

الحكمة:

بيستغرب أدونيس ليش الثورة لجأت للتسليح..

حاولنا بصواتنا بالأول، بس ما بيفهم بالحكي الشبيحزياد الصوفي – مفكر حر؟