قصة و حكمة من زياد الصوفي..105

القصة:

من أكبر التحديات اللي رح نواجهها باليوم التاني من بعد الأسد، و من ضمن سلسلة طويلة من التجديات، رح تكون معالجة الفرد السوري من كل الآفات اللي أنزرعت فيه بدون قرار مسبق منو..

المواطن السوري وعي على موضوع الرشوة، و ما بقى بقرارة نفسو بيقدر يمشي بمعاملة بدون ما يشيل جزدانو، لأنو ببساطة كاملة، كل معاملاتو الحكومية رح اتواجه مطب ورا مطب لتعطيلها بداية من أصغر موظف بالدولة وصولا لرئيس ما يسمى دولة..

و لحتى ضل بسياق قصة مبارح ( 104 )، حكاية اليوم عن فساد المؤسسة العسكرية بسوريا..

و لحتى ما أبعود أكتر، مبارح حكينا عن قصة سوزان نجم الدين مع رئيس فرع التحقيق بالشرطة العسكرية المقدم عبد الحميد محمد..

من ضابط مدرب بمدرسة الشرطة العسكرية، اترقى بعد ما قدم كل واجبات الطاعة ليصير رئيس فرع التحقيق العسكري ( القابون )..

كشخص ما بيعنيلي شي أبدا، بس هية محاولة لإسقاط قصتو على واقع المؤسسة العسكرية و الأمنية بسوريا..

الدكتور سامح الدرعاوي، شب خلص دراستو و عمل اختصاص و قرر فتح العيادة بالشام لتوافر فرص للعمل أكتر من مدينتو درعا..

بيلم مصرياتو و بيتدين الباقي و بيشتري عن طريق مكتب عقاري بالشام بيت بالحجر الأسود..

بيشتري العفش و بيجهز حالو لنقلهون.. لما بيوصل عالبيت بيشوف ضابط قاعد بالبيت و فارشو..

مين حضرتك و شو عم تعمول هون؟؟

أنا الرائد نبيل سليمان من مرتبات الفرقة 14 قوات خاصة، و هاد بيتي اللي اشتريتو من كم يوم..

لما بيقعدو الدكتور و الرائد بيفهمو أنو السمسار بايع البيت للشخصين..

سامح بيحمل حالو و بيمشي و هوة عرفان ضمنا أنو ما رح يطلعلو مع ابن القرداحة الرائد بالقوات الخاصة، فقرر يشوف طريقة يحل فيها هالموضوع..

بيركب بسيارتو و بيقرر يروح عند المقدم عبد الحميد لأنو سمعان عن فسادو و قدرتو عالتحرك بهيك مواقف..

المهم..

والله قصتك صعبة يا دكتور، بتعرف ما هينة تخلصو البيت لرائد من القرداحة و فوق منها بيخدم قوات خاصة..

أنا جاهز يا سيادة المقدم لأي كلفة بس بدي بيتي اللي دافع حقو دم ألبي..

و الله بتكلفك 100 ألف ليرة يا دكتور..

المقدم و عالرغم من نفسو الطائفي اللي كل مين خدم معو حس فيه، إلا أنو وقت المصاري ما بيتعرف عسيدنا علي..

فقام بالتنسيق بين شعبة التحقيق و القضاء العسكري بفبركة كتابة شكوى عالرائد نبيل و تسليم البيت لمن يثبت ملكيتو مع حشوة ترهيبية بنهاية المذكرة: لقد قام الرائد نبيل سليمان بسب سيادة الرئيس حافظ الأسد..

اتحولت المذكرة للمخابرات العسكرية اللي حققت مع الرائد و اتأكدت من براءتو بدعوى سب الرئيس البائد الخالد..

اثناء توقيفو، كان المقدم عبد الحميد عم يحاول جهدو إثبات ملكية البيت للدكتور سامح، بس ما طلع معو شي..

لما طلع الرائد من سجن التوقيف، اتصل فيه المقدم و قلو: معك 24 ساعة لتخلي البيت و اتسلمو للدكتور نبيل..

بس نحنا أهل يا سيادة المقدم و الدكتور غريب باشارة من الرائد لانتماءهون لطائفة وحدة..

بس طائفة المقدم كانت طائفة الدولار و ما بيعترف بشي إلا بالمصاري..

تاني نهار بيحمول حالو المقدم عبد الحميد مع ست عناصر و بيداهمو بيت الحجر الأسود..

و بغفلة من المقدم و عناصرو و اثناء تفريغ البيت، بيشيل مسدسو الرائد نبيل و بيقوصو للمقدم طلقة براسو بيوقعو ميت بلحظتها..

العناصر عم تهرب من البيت، و الرائد واقف فوق جثة المقدم عم يتفرج عليها و ما عرفان شو اللي ناطرو..

بيضل ببيتو مع الجثة لحد ما وصلت دورية تانية لتشيل جثة هالمعفن، و تلقي القبض على الرائد نبيل..

نتيجة تدريبو بالقوات الخاصة، و اثناء القاء القبض عليه، بيحاول يخلص أحد العساكر روسيتو، و بيوقف كلشي لما بتطلع طلقة من الروسية و بتدخل براسو للرائد نبيل..

كنا بجثة مقدم، صار عنا جثة رائد و مقدم..

بينقلوهون الاتنين على مشفى الرحمة اللي عند دوار مخيم اليرموك، بيوصلو الضابطين ميتين عالمشفى و ما قادر حدا يعمللهون شي..

الموضوع متل ما هوة بيتحول لرئيس الجمهورية البائد، على اعتبار أنو الموضوع فيه مقتل ضابطين..

فكانت وصية حافظ الأسد، تسليم البيت لعائلة الرائد المقيمين بالقرداحة، و اعتبار المقدم عبد الحميد محمد، و الرائد نبيل سليمان شهداء..

و الحكم على العسكري اللي طلعت منو طلقة الروسية و قتلت الرائد بالسجن سنتين بتهمة القتل غير العمد منشان عيلة الرائد ما تحس بالغبن و الرغبة بالانتقام من عيلة هالعسكري المسكين القاتل..

الحكمة:

انقتل رائد و مقدم منشان شقفة دار..

التسلسل العسكري بيقول: الدور الجاية على ماهر العميد و من بعدو الفريق بشار..زياد الصوفي – مفكر حر؟