قصة و حكمة من زياد الصوفي..104

القصة:

أربعين سنة و نحنا نسمع أنو سوريا دولة مؤسسات و قانون، و الكل تحت سقف الوطن و ما حدا بيعلا عن القانون..

سقف الوطن بالنسبة للنظام هوة عدم المساس بشخص الرئيس، و أبناء الرئيس و أحفاد الرئيس و أبناء عم الرئيس.. أما المؤسسات نفسها فهاد الشي آخر همهون..

أهالي اللادقية كانو ينتظرو بالنظرة زيارة مفلح ابن محمود الزعبي عاللادقية، ليشوفو الإهانات اللي كان يتعرضلها من ولاد أخوه للقائد البائد..

رئيس وزرا، رئيس مجلس شعب، عضو قيادة قطرية، كلو ما مهم، المهم ما حدا يقرب على عيلة الأسد لأنهون هنن الوطن و سقفو..

بصيف من صيفيات الشام سنة 2000، شب عم يطلع بسيارتو بأحد حواري المزة، بيتفاجأ بنهاية الشارع بسيارة مرسيدس فيها أربع بنات و لاحقتها سيارة بيجو 504 عسكرية..

الطريق ضيق و ما بيساع لاكتر من سيارة، يا إما الشب رح يرجع كل الطريق اللي قطعو، أو البنات بسيارتهون و البيجو اللي وراهون يرجعو خمس أمتار لحتى يمر الشب..

بينزل شوفير البيجو العسكرية:

حرك من هون يا حيوان، ما شايفنا بدنا نمر ؟؟

بس يا معلم ارجعلك كم متر و اتركني اقطع الشارع و خود بعدين كل رياحتك..

بينزل الضابط اللي لابس مدني من البيجو و بيقرطو قتلة لهالشب بيفرجيه نجوم الضهر بعز عتمة الشام..

بيحمل حالو هالشب و بيروح على شعبة التحقيق العسكري و وجهو معبى دم منشان يشتكي على صاحب البيجو..

شو اسمك؟؟

طارق عبد الرحمن خليفاوي.. أبويي أول رئيس وزرا بعد الحركة التصحيحة..

بيعمول المحقق محضر و بيروح لعند رئيس الفرع المقدم عبد الحميد محمد من الدريكيش بيقلو:

سيدي عنا ابن رئيس الوزرا خليفاوي جاية يشتكي على صاحب هالسيارة رقم كذا أنو ضربو و وجهو مليان دم و كدمات..

ايه اعملو معاينة لحالتو الصحية، إذا ما فيه شي خليه ينقلع و يشتكي بالقضاء العسكري..

بس يا سيدي هاد أبن رئيس الوزرا الخليفاوي..

ايه طظ شي بيخري.. روح شوف لمين هالسيارة و خبرني لحتى انشوف شو بدنا نعمول..

بالوقت اللي عم ينعمل لطارق معاينة، كان المحقق عم يشوف لمين هالسيارة..

بالنسبة للجروح، ما في شي خطير بيستدعي توقيف المعتدي..

أما بالنسبة لصاحب البيجو، فبعد التدقيق بيكتشف المحقق أنها للنقيب تمام نجم الدين الصالح..

بيجوز ما حدا سمعان بهالأفندي، بس بالحقيقة هوة نقيب من الدريكيش بيخدم بوقتها بشعبة شؤون الضباط قبل ما ينقلوه ليخدم بالقصر الرئاسي لاحقا، أما شغلتو الرسمية فهية: أخوها للممثلة سوزان نجم الدين..

أنو شو بتشتغل يا ابني؟؟؟

نقيب أخوها لسوزان نجم الدين..

المهم، المحقق ابن الحلال بينصحو لطارق يروح يشوف واسطة أو حدا من معارف أبوه رئيس الحكومة السابق لحتى يقوم فرع التخقيق و بدون أوامر من القضاء العسكري بتوقيف المدعى عليه النقيب أخو الفنانة..

بيحمل حالو الولد و بيخبر صديق والدو العماد طلاس، اللي بيبعت لرئيس الفرع أوامر بتوقيف أخو الفنانة..

تلات أرباع ضباط الفرع من الدريكيش، و رئيس الفرع من الدريكيش، و المدعى عليه النقيب أخو الفنانة الدريكيشية..

بيحاول رئيس الفرع يطلب من طارق يتنازل عن حقو بس ما طلع بأيدو شي..

اتصلو كل ضباط الأرض ليتدخلو عند رئيس الفرع منشان يخلصوه للنقيب و ما حدا طلع معو شي و خصوصي بعد ما وزير الدفاع أمر بتوقيفو..

أكبر الشخصيات اتدخلو ليحلو الموضوع و ينهوه، و طارق شادد ضهرو و ما عم يتنازل عن حقو..

لحد ما قررت معاليها تتدخل..

معالي الفنانة الركن سوزان نجم الدين..

بتروح لعند رئيس الفرع: بدنا تحللنا الموضوع يا سيادة المقدم، و الله ما حرزاني..

يا ستنا و الله معك حق، بس الولد راكب راسو، و أبدو يتنازل عن حقو..

و مين بيكون هالولد لحتى شادد ضهرو؟؟

ابن رئيس الحكومة السابق الخليفاوي..

ايه طظ شي بيهوي.. بدي الموضوع ينحل اليوم..

بالفعل الموضوع بينحل بنفس اليوم، و بيطلع قرار توقيفو لأخو الفنانة، و بيتوقف خمس أيام بسجن بيت أختو سوزان عأساس هوة محجوز بسجن المزة العسكري..

بعد ما طلع من سجن الفنانة الركن سوزان، بيترقى و بيصير بالقصر الجمهوري عم يخدم تحت أيد قائد دولة المؤسسات..

الحكمة:

إذا عندك بدولة القانون مشكلة يا فدان، بيكفي تكون أخوها للفنانة الركن سوزان..

و إذا اتعرضت بدولة المؤسسات لخلاف، كلفتها فنجان قهوة عند أم المحرومين سلاف..

لزمك واسطة من شي نجس من هالانجاس، كلهون رح تشوفهون ببيت سارية السواس..زياد الصوفي – مفكر حر؟