قصة و حكمة من زياد الصوفي.. 93

القصة:

كتار اللي بيتساءلو أنو شو اللي رح يعملوه الشبيحة بس يسقط بشار الأسد..

كترت التحليلات، و اتعددت الآراء ، و الكل معو حق و حامل جزء من الحقيقة بتكهناتو..

أنا من وجهة نظري و من احتكاكي بشبيحة اللادقية و معرفتي بسلوكهون، هنن أجبن ناس عالأرض.. مخلوقات انتهازية خلقت من العدم و اتطورت وحشيتهون بالتوازي مع ضرورة وجودهون..

من أدوات الشبيحة، كمال الجسمان.. و ترباية العضلات ، اللي بتتناسب بالكبر عكسا مع تطور عقولهون..

و حكاية اليوم من وحي هالموضوع..

اتطلع فواز الأسد الصبح بكلابو، أبو الغضب و دحروج و المغيروني، شاف كل واحد فيهون أد اللوح، زند أيد الواحد فيهون بحجم راسو..

و أنا شو ناقصني يعني تاصير متلن يعني؟؟

شو هنن شبيحة أكتر مني يعني؟؟

أسئلة كتير خطرت عبالو لأبو جميل من عبكرة الصبح، و أنو ليش لأ العب رياضة و صير قد الفدان..

و اللي ما بيعرفو لأبو جميل، ما بيعرف أنو هالمخلوق عبارة عن كائن متوسط الطول، رجليه ضعاف كتير لدرجة ملفتة للنظر ، و راسو كبير و بلا رقبة..

تلات أندية يومها باللادقية كانت شغالة بهالمجال، و واحد منها كان نادي النجوم بالقلعة صوب جمعية دفن الموتى و صاحبو نمير مظلوم بطل الجمهورية بكمال الأجسام..

بيركب بهالسيارة و بياخود كل كلابو معو و بوجهون عالنادي..

ولك مظلوم تعا لهون..

بيأشر بأيدو على صورة لأرنولد معلقة على حيط النادي، و بيقلو: كم بيلزمني يوم لحتى صير متل هالكر؟؟؟

بدي العب حديد و كبر عضلات جسمي بسرعة و بلا تعب.. قلي عالسريع شو المطلوب؟؟

والله يا استاذ ما في نتيجة بتجي بدون تعب، انت بس تقرر تبدا، أنا برتبلك برنامج فيزيائي و غذائي و خلال تلات شهور زمان بتبلش تشوف النتيجة..

و شو شايفني ما أعمل هون، مشتقلك مثلا؟؟؟ ايه أنا مقرر و بدي أبدا من اليوم..

ايه عظيم استاذ، و اتركها علي..

بعد ما قدملو الكابتن نمير برنامجو الغذائي، صرخ أبو جميل بدحروج:

و لك دحروج، روح نط عند الصوفي جبلي كوكتيل، و بوجهك من عند اسبيرو كيلو لحمة مشوية..

كل يوم هالابو جميل تلاقيه تارك كل شي و نازل عند الضهر عالنادي..

زباين النادي صارو يعرفو مواعيد جيتو، فالكل غير مواعيدو..

يوميا على هالحالة..

أبو جميل داخل بالبروتيل الأسود و لاحقتو ريحة اللحمة المشوية و ابريق العصير..

يمل من التمرين ، يشغل سيغارة..

يقعود على جهاز الصدر، يحملولو المرافقة السيخ بلا وزن و هنن يرفعو عنو..

كل يوم على هالمسخرة، و هالمسكين نمير متحمل بلادتو و ريحة دخانو بالنادي..

بيخلصو التلات شهور و للأمانة و للتاريخ ما قطع أبو جميل و لا يوم تمرين..

بس السؤال: شو كان عم يتمرن؟؟؟

ولك مظلوم تعا لهون: هلق من تلات شهور هنت شو قلتلي؟؟ ما قلتلي أنو جسمي بيصير متل ارنولد إذا اتمرنت و أكلت لحمة و شربت عصير؟؟؟

ايه مبالا استاذ..

اتطلع فيني مزبوط.. شايفني ارنولد يا حيوان؟؟؟

تلات شهور و أنا ما تعب حالي و أجي لهون، منشان شو؟؟؟

ولك دحروج عيطلي لهالكرارة اللي برا، و كسرولي هالنادي من فوقو لتحتو..

الآلات قلبت عالأرض، المرايات اتكسرت، الأدواش بالحمامات اتقبعت من محلها..

و فوق منها بيحكي مع البلدية لتسكر النادي عالاخر بتهمة الغش..

اتسكر النادي تلات شهور، و الكابتن نمير ما ترك واسطة تعتب عليه لحتى يرجع يفتحو، و ما نجح بإعادة فتحو إلا بعد ما حط اللي فوقو و اللي تحتو رشاوي…و بعد ما اتعهد قدام فواز أنو يدرب فدادينو عندو بعقد للأبد و بدون كلفة..

الحكمة:

اللي خايف من الشبيحة بعد الأسد، جبانين و رح يهربو عالجرد..

بعد ما أثبتو 40 سنة نظرية داروين أنو أصل الانسان قرد..