قصة و حكمة من زياد الصوفي.. 82

القصة:

كان الوالد يقلي: إذا بتعاشر رقاصة بيقولو عنك طبال.. ابعود يا ابني عن عشرة بيت الأسد، و عن عشرة ولاد الضباط، ما بيجيك منهون إلا المشاكل و وجع الراس..

و بالفعل و طول عمري اللي عشتو بسوريا، ما كان عندي لا رفيق ابن مسؤول و لا بعرف من بيت الأسد حدا بشكل شخصي..

بس ببعض الأحيان، الظروف بتكون أقوى منك..و ما بتخليك انت بنفسك تقرر أصدقاءك و معارفك، و مثال عهالشي، مالك صاحب قهوة العصافيري باللادقية، شب هوة و عيلتو دفعو تمن كبير لمجرد أنو فواز الأسد كان يحب يقعد بالقهوة كل يوم..

و اتكونت علاقة بين هالشخصين، ما قدر مالك يتهرب منها و لا يوم بحياتو..

حكاية اليوم رح تشرحلكون شو اللي ممكن يجيكون من عشرة ولاد المسؤولين و تحديدا بيت الأسد..

صيف 98 و الناس عالبحور و عالجبل..صلنفة و كسب لأولاد اللادقية و حلب، الرمال و المشتى لأولاد حمص و طرطوس، و وادي بردى لأولاد الشام..و محافظة باريس و ضيعة لندن لأولاد بيت الأسد( الله يرحم جدودهون)..

إلا فواز الأسد.. لا كان يحب يسافر و لا يطلع برا البلد.. أنو قاعد عقلوبكون يا ولاد اللادقية صيف و شتا…

بيطلع خبر أنو جورج وسوف جاية على مشتى الحلو بسهرة عيد السيدة..

هيك نوع من الاخبار بتبسطو كتير لأبو جميل، لأنها مناسبة للظهور قدام العالم و فرصة لممارسة التشبيح..

بيدخل عالعصافيري و بيناديلو لمالك: و لك مالك حضرلي حالك على يوم السيدة ناعسة رح نطلع عالمشتى نحضر بو وديع.. ماشي؟؟

و الله يا معلم ما رح أقدر روح معك جاييني ضيوف.. إنشالله غير مرة..

ولك مالك، علي الحلال ماني رايح إذا هنت ما رح تروح، بكرة منجيبو لهالكر الوسوف لعندي عالمكتب بيغنيلنا للصبح..

بيمر الاسبوع متل نوم العيون و بيوصلو ضيوفو لمالك من بيروت و المفاجأة انهون حاجزين طاولة لحفلة الوسوف نفسها و حاسبين حسابو لمالك ياخدوه معهون..

غط على ألبو لهالمسكين مالك، لا قادر يقول لضيوفو أنو ما قادر يروح معهون منشان الحديث اللي صار مع فواز قبل بكم يوم، و لا قادر يقلو لأبو جميل يجي معهون، ما بدو يبهدل حالو قدام ضيوفو مع هالاجدب..

صباحية الحفلة، مالك و ضيوفو الخمسة بيركبو هالسيارات و بيطلعو عالمشتى بعد ما مالك وصى كل معارفو أنو ما يحكو لأبو جميل إذا سألهون عنو…

بس الخدومين كتار…

بيجي بالليل فواز عالقهوة و على عادتو أول شي بيعملو قبل ما يغسل وجهو بالويسكي أنو بيسأل وينو مالك؟؟

و الله طلعو الخدومين كتير كتار، و خلال لحظات كان أبو جميل عرفان أنو مالك أخد ضيوفو و طلعو عالمشتى يحضرو أبو وديع..

كلام الناس لا بيقدم، و لا يأخر..

بيوقف أبو وديع عن الغنا، و تحية لأبو جميل اللي نورنا و أهلا و سهلا أبو جميل، ماني سامع أبو جميل..

مالك الحزين متل اللي انكب برميل مي سخنة على ضهرو، عرف أنو البهدلة قربت..

بيحط أيدو أبو جميل عكتفو لمالك: إنشالله مبسوط بهالسهرة يا مالك؟؟ قلي إذا الوسوف ما يغني منيح لحتى نطلبلك كم غنية على كيفك يا مالك..

الشر بعيونو لأبو جميل، لما بيطلب من مالك و ضيوفو يمشو معو برا الصالة..

الوسوف عم يراقب أبو جميل و هالست شباب اللي عم يتركو الصالة: الله معك يا أبو جميل..

ولك ريجعلك ريجعلك..

سيارتين مرسيدس عباب الصالة من برا، و ميكرو باص أبيض صغير..

بتفهم وجود المرسيدسات بوجود أبو جميل، بس اللي ما بتفهمو وجود سرفيس صغير عم يرافق موكب المعلم..

بيركضو المرافقة و بيمسكوه لمالك و ضيوفو، و بيحطوهون بالسرفيس، و بيقفلو الأبواب عليهون..

ولك ما بس كذبت علي يا مالك، و طالع فوق منها تنبسط من دوني!!! ايه انقبر هنت وضيوفك هالزبالات بالسرفيس، و أنا ببقى بحكيلك عالسهرة و شو صار بس خلصلك هالليتر الويسكي اللي طالبو ..

لو نويت تنسى اللي فات، و اللي كان و الذكريات..

ضل مالك يغنيلو هالغنية لأبو جميل شهر كامل حتى يسامحو على هالعملة السودة..

الحكمة:

بصلنفة.. بكسب.. بالمشتاية..

كلاب أبو جميل معباية.. ما فيك تتخبى حتى لو لابس مانطو و جبة و عباية..