قصة و حكمة من زياد الصوفي ..77

القصة:

شبيح اللاذقية فواز الأسد عم المجرم بشار

من كل القصص اللي كتبتها، بعتقد كل مين قراها اكتشف طرف من الجنون عند فواز الأسد بالاضافة للسادية و إلاجرام و جنون العظمة..

الجاهل اللي بيقرر يصير محامي بليلة مافيها ضو قمر..

و القبيح اللي معتقد حالو دونجوان عصرو..

و المهرب اللي اعتقد حالو رجل أعمال..

كل هالشي، و اليوم رح أكشكفلكون عن جانب جديد من حياتو..

الجانب اللي معتقد حالو فيه أنو خفيف الدم..

الله يرحم الأيام اللي كان فيها الشبيح يحسب ألف حساب قبل ما يدخل عالصليبة..

بعد مجزرة حماة، انفرض واقع جديد على سوريا بشكل عام و على اللادقية بشكل خاص..

الصليبة متل كل الحارات الأصلية باللادقية، لما ما قدرو يتوقعو ردات فعل أهاليها أيام ثورة التمانينات، شاف النظام بعد ما باد اللي بادو، و بعد ما اعتقل و قتل اللي فيه النصيب، شاف أنو لازم يضبط هالحارات على إيقاعو..

زرع العواينية من أهل الحارات نفسهون بكل محل، وزع الحشيش و المخدرات ليضل مسيطر على ضعاف النفوس و الأخلاق..

قصة اليوم من هالحارة بنص التسعينات..

كوكتيل الصوفي نقطة علام بنص الصليبة، محل صغير ما بيعمول إلا الكوكتيل و الرز بحليب.. شهرتو وصلت لآخر الدنيا بسبب و بدون سبب..

الدنيا رمضان و العالم خلصت صلاة التراويح لما بتوقف سيارة ميرسيدس بدون نمرة على باب محل حسن صوفي، و بينزلو تلات شباب ملتمين من السيارة و بيدخلو عالمحل بين كل العالم باسحلتهون و بيهددوه لحسن إذا ما بيعطيهون غلة اليوم رح يقوصوه و ينهولو حياتو..

كل الموجودين بالمحل، ارتعبو لما شافو شوفة بالعادة ما بيشوفوها إلا بأفلام سينما الكندي..

بيفتح الدرج حسن و بيشيل كل غلة اليوم و كانت حوالي 35 ألف ليرة و بيعطيها لهالحثالات و بيطلعو من الصليبة تحت عيون أهلها لا من شاف و لا مين دري..

أمرك لالله يا حسن..

حسبي الله و نعم الوكيل فيهون..

الله يصطفل فيهون..

كل أهل الحارة عم يواسوه لحسن..و هالمسكين حط أيدو على خدو و راح بالصفنة ما عارف لمين بدو يشتكي.. فالشكوة بدولة الأسد لغير الله مذلة..

ساعة بعد هالحادثة..

بتوقف BMW بيضا على باب المحل، و بينزل فواز الأسد منها..

ولك حسن أعملي ابريق كوكتيل موز و حليب و فريز و كترلي العسلات..

أمرك معلم و الحزن على وجهو لحسن..

ولك حسن شو قصتك؟ و على شو ضارب هالخلقة الل بتخري؟؟

ما رح أشغلك بالك يا معلم بقصصي، بعرف هموم الوطن كلها شايلها عكتافك..

ولك قلي قلي شبااااااك؟؟؟ ضارب وش متل القط اللي قاتلو صاحبو..

بيروح حسن بيحكيلو القصة كلها لفواز من وقت اللي دخلو الشبيحة لعندو لوقت اللي سحبو سلاحهون لوقت اللي هددوه لوقت اللي آخدو منو المصاري..

هلق هودي حكايتك كلاااا و قاعد ضاربلي بوز..قلي مين هالحواوين لحتى اجعل الله ما خلقن..

والله ما بعرفون يا معلم كانو ملتمين و ما مبين من وجوهون شي…

و بنص هالنقاش بيوقف فواز بأرضو و بيضحك ضحكة متل الفدادين بنص المحل، كل الناس اللي برا سمعوها..

ما عملتا فيك يا حسن يا جحش.. لعمى إذا شفت أجحش منك.. و لك خود خود هودي مصاريك، كنت ما العب و أمزح معك..

و ضحكتو بعدها معباية الصليبة : لما كنت قلك يا حسن هنت و غيرك من الكرارة، أنو ابيصير شي باللادقية إلا و أنا إلي أيد فيه، حتى اتصدقني..

بيعطيه المصاري و بيطلع ضحكان هوة و فدادينو من المحل..

لما بيتطلع حسن عالمصاري، بيشوفهون 25 ألف بدل 35 ألف.. بس بأي دولة بالعالم بيقولو الرمد أحسن من العمى، بس بدولة الأسد، العمى أحسن من كلمة الله يرحمو..

يرحم أمواتكون جميعا..

الحكمة:

عيلة غليظة من السقف للأساس.. ولك حتى مزحكون متل الضرب عالراس..زياد الصوفي – مفكر حر؟

About زياد الصوفي

كاتب سوري من اللاذقية يحكي قصص المآسي التي جرت في عهد عائلة الأسد باللاذقية وفضائحهم
This entry was posted in الأدب والفن, ربيع سوريا. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.