قصة و حكمة من زياد الصوفي.. 73

القصة:

كل المفاهيم اللي ربينا عليها على أيدين هالنظام بالخمسين سنة الماضية، كانت أما كذب أو نفاق..

الشعار القومي بالوحدة و الحرية و الاشتراكية، ما عرفنا عنو شي إلا ترديدنا ألو عند مطلع كل شمس بساحات المدارس و قريناه بس على يافطات المؤسسات العامة..

و حالة الأمان اللي كنا عايشين بوهمها، اتضح أنها كانت تحت ظل البراميل المتفجرة مو تحت ظل نظام فارضها من خلال مؤسساتو..

أما فكرة حماية الأقليات فهية أكبر كذبة عشناها و مع الأسف لهلأ في فئة حابة اتضل مصدقة هالكذبة عالرغم من إيمانهون بأنها حقيقة مو موجودة..

سوريا متل رقعة الشطرنج بالنسبة للنظام..

العلوي فيها هوة الجندي.. المسيحي هوة القلعة.. الدرزي هوة الحصان.. و الكردي هوة الوزير..

أما السني فهوة قنبلة موقوتة لازم نترك الصاعق بأيدنا..

حكاية اليوم عن قصة صارت باللادقية بصيفية 86..

لما كان يزداد الضغط على حافظ الأسد من كتر الشكاوي اللي تجيلو عن ابن أخوه فواز، كان بالعادة ياخدو عالشام و يخليه بإقامة جبرية باوتيل الشيراتون ( الله يطعمنا هيك اقامة جبرية ) لمدة كم يوم و يرجعو بعدين عاللادقية ليكمل مسيرة النضال..

غاب فواز عن اللادقية لاكتر من شهر، و كترت الإشاعات، شي يقول مريض، و شي يقول بمهمة تهريب بلبنان، و بالأخير اتوضحلنا أنو كان بأحد زياراتو المتكررة للشيراتون..

بعد ما أنهى فترة العقوبة بحمامات الشيراتون و مسابحها.. ظهر بعد الضهر بقهوة العصافيري عالكورنيش القديم باللادقية..

داخل و شياطين الأرض كلها عم تنط بوجهو..

في ولد جسري اسمو طارق كان يشتغل غارسون بالقهوة.. المعروف عن أهل مدينة اللادقية لما بدهون يلفظو اسم طارق بيقولو طارء..

كان فواز قبل هاليوم يوميا كل ما دخل عالقهوة يناديلو لطارء..

شو اسمك هنت؟؟

بلهجة أهل الجسر كان يجاوبو: طاريق..

عيني ربك يا طارق، فهمن لأهل اللادقيي الجحاش كيف لازم يذكرو اسمك.. و يناولو كل مرة 500 ليرة تعبة ذكرو حرف القاف..

منرجع لهداك اليوم، فواز و شياطينو كلهون داخلين سوا عالقهوة، بيسحب هالكرسي و بيناديلو لطارق: تعا ولك جحش..

بيجي هالمسكين ركض و بسذاجة بيقلو: اسمي طاريق سيدنا..

ايه شي بيخري.. ولك هنت اللي كاتب فيني التقرير أنا بعرف..

و بيناديه لأديب قميرة صاحب القهوة و بيقلو: أبقا بدي شوف خلقتو لهالحيوان عندك.. بيضربو كف بيبرمو برم لطارء و بيقلو : بكرة بتجي لهون بتنتظرني و معك 25 ألف ليرة اللي عطيتك ياهن خمسميات، فهمان يا جحش؟؟

الكل قاعد بالقهوة عم يتفرج عجنونو لفواز و ما حدا قادر إلا عكلمة حسبي الله و نعم الوكيل من هالكلب عند هالمسا..قطعلو رزقو لهالولد و فوق منها ركبلو دينة طويلة عريضة، غير رب العالمين ما بيعرف كيف رح يسددها..

شب مسيحي من بيت عكاري كان قاعد يومها بالقهوة.. هالشب ما باتذكر إلا كانو الناس ينادولو حجي.. و أنا استغرب، أنو هالشب مسيحي، ليش العالم بتناديلو حجي..

بيصرخلو أبو جميل: و لك حجي تعا لهون..

المسكين بيركض لعندو، خير استاذ فواز..

هلق هنت ليش بينادولك حجي و هنت مسيحي؟؟

و الله يا استاذ لأنو عملت حج ببيت لحم لهالشي الناس بيعيطولي حجي..

و هون بديت السمفونية التاريخية لفواز و اللي دائما بيكررها مع كل مسيحي بيقابلو و بدو يذلو..

و أعذروني عتكرارها بس لمجرد شرح الحالة..

هلق هنت يا عكاري، ابتعرف أنو أنا بيو للمسيح؟؟ و لك هنت ابتعرف أنو مريم مانها عذراء و أنا اللي عامل فيها هيك و هيك..بعرف انك هنت اللي كاتب فيني التقرير، روح انقلع و أبقا بدي شوف هالخلقة النسة هون بالقهوة..

من قلة أخلاقو لفواز انصدم الحجي لحد ما الدمعة علقت على عينو و مشي بدون ما يجاوبو بكلمة وحدة..

بنفس القعدة..و بتقولو يا جماعة لو كان فواز عم يختار العالم عن قصد ما طلع معو هالشي..

بدي بالجسري السني..

كمل بالحجي المسحي..

و إجا دور ابن طائفتو العلوي..

شب اسمو حسن غزال كان قاعد يومها بالقهوة عم يراقب هالمجنون..

و عيلة غزال بالمناسبة عيلة مشايخ عند الطايفة العلوية..

و لك غزال.. تعا لهون..

خير استاذ فواز..

بحضي بديني بديانتي، هنت اللي كاتب فيني هالتقرير..و لك معتقد إذا بعيلتك في هالكم شيخ حاطين لفات عراسهن، هالشي بخليك تكتب بربك فواز تقارير..

و لك هنت و مشايخك ما شايلكن من أرضكن..

روح انقلع من هون و قلو لشيخك: ربي فواز هيك قلي.. و يا ربك شوفك مرة تانية هون..

خلال و بعد استعراض حفلة هالجنون، كانت القهوة عم تصفر و ما بقيان فيها إلا فواز و كلابو، و حيطان قهوة عمرها من عمر ذكرياتنا نحنا أهل اللادقية مع كورنيش اتحول بسحر بعثي لمرفأ قبيح قسم اللادقية لشرقية و غربية بتعمد…

الحكمة:

باستغرب بأمر السوري اللي بدو يعمول ثورة..

الدرويش منكون ما بيلبس إلا من

Benetton

و المذنب ما بينحبس إلا بال

Sheratton..