قصة و حكمة من زياد الصوفي.. 57

القصة:

بفتح عيوني الصبح على صوت بياع التين و الحليب و صوت الماما و التاتا عم يفاوضوه عالسعر..

منشتري منك كل الأرطل بخمسين ليرة..

تكرم عيونك يا خالتي والله أبزعلك..

هيك بيبدا أي يوم عادي بأي صيفية عادية بصلنفة.. بعد الفطور و تقديم الوصايا و النصح من البابا عالشي المسموح و الشي الممنوع نعملو، بتقلي الماما خود مصاري يا زياد و طلاع عالساحة جبلنا خبز…

صيفية 1992 و أهل اللادقية كلهون هربانين من رطوبة اللادقية، و قاعدين عالجبل فوق..

على راس الطلعة صوب بيت أهلي و أنا و بطريقي عالفرن، بشوف أربع سيارات جيب كبيرة آخر موديل و مليانة عناصر حاملين روسيات بمخزنين مربوطين بشرطيطيون، و على صدورهون جعب مليانة مخازن، و على كتفهون شريطة مكتوب عليها الحرس الجمهوري..

بمر من بيناتهون و حقيقة كانت أول مرة بحياتي بشوف ناس مسلحة بهالطريقة..

على مفرق قهوة سامر عشر عساكر نفس المواصفات.. على مفرق قهوة الحلوين عشر عناصر تانية، بالساحة فوق في أكتر من 30 عسكري مجعب و مسلح بالكامل، بالسوق نفس الشي، عند دير اللاتين نفس المشهد..

وين ما رحت يومها بصلنفة هادي هية الصورة الوحيدة اللي بتشوفها..

سنة 92 كانت صلنفة بعدها لحد معين بس لأهل اللادقية، و كل المصطافين يومها واقفين على البلاكين عم يتفرجو على هالعرض العسكري الغير مألوف بهالمدينة الصغيرة..

عمي أبو سمير شو القصة؟؟

والله يا ابني ما بعرف شو صاير، من الصبح وصلو كل هالعساكر و انتشرو بصلنفة متل مانك شايف، و ما حدا حتى بيسترجي يسألهون شو في..

شوف شو بدك من السوق تشتريه و عالسريع رجاع عالبيت ما حدا بيعرف شو ممكن يصير..الله يستر…

حملت ربطة الخبز و راجع عالبيت عالسريع حتى احكيلو للبابا شو شفت فوق..

أنا و عالطريق، عم شوف هالعساكر عم توقف كل سيارة مارة أو داخلة عصلنفة..

وراق السيارة و افتحلنا الطبون..

بيقري الأوراق و بيقارنها برقم مكتوب على محرك السيارة، يا بيقول الله معك، يا أما بينزل صاحب السيارة بيضبو بسيارة الحجز و بيسحبو السيارة على جنب..

بعد كم ساعة بتتوضح الصورة..

من جملة تلميع صورة باسل الأسد، قرر أبوه يبعتو على اللادقية مع كتيبة من الحرس الجمهوري لمصادرة كل السيارات المهربة و الداخلة عالبلد بشكل غير نظامي و بدون أوراق..

هلأ من الطبيعي أنو أصحاب هالنوعية من السيارات أكيد كلهون من عيلة و أصحاب بيت الأسد، لأنو المواطن العادي أكيد مارح يسرق سيارة و يلزقلها نمرة و يمشي فيها..

ما ضليت سيارة لشبيح بالبلد إلا أتوقفت و انحجزت و أخدو صاحبها على عيون العالم البسيطين انو شو خبر، عم ينضفو البلد..

الحملة بتستمر يومين، و بيرجعو الحرس الجمهوري على الثكنة تاركين هالمهمة لشرطة المرور..

باليوم التالت بعد ما اطمئن هارون الأسد أنو ابن عمو باسل أخد جماعتو و راحو، بيطلع عصلنفة بسيارة رانج روفر حمرا..

بيوقفوه الشرطة عند مدخل صلنفة الجنوبي من الطريق الجاية من القرداحة..

الوراق إذا سمحت استاذ هارون..

-شو بدكن؟؟

عندنا أوامر استاذ هارون بتفتيش كل السيارات..

– جرب تلقها للسيارة و شوف شو رح أعمل بصلنفة..

بس يا استاذ ما فينا ما نفتش السيارة..

– ايه تكرم عيونكن..

كنت قاعد صوب بيت عازار عم اتفرج على الحادثة، بيدور السيارة هارون و بشوفو بيكرب حزام الأمان، و بيبرم السيارة باتحاه حيط الدير و بيمشي بسرعة البرق و بيضربها بالحيط من قدام، بيركب أنرييه و بيمشي بسرعة بيضربها للسيارة من ورا على حيط بيت الساعي..

شوي لقدام و شوي لورا حتى صارت الرانج روفر عجيبنة…

الناس واقفة عم تتفرج و الشرطة عم يراقبوه لهالمجنون كيف عم يكسر السيارة و ما حدا قادر يفتح تمو بحرف..

بينزل بصعوية من باب هالسيارة المكسرة و بأيدو روسية..

بيفضي مخزن متل ماهوة على بطن السيارة، و بيصرخ:

خدوها هلق للسيارة و قولولو لباسل بيقلك هارون مبروكة عليك..

و بيمشي بين هالناس عم يتمختر بأيدو روسية فاضية و تارك وراه هدية لابن العم..

الحكمة:

بدك الرانج خدها مكسرة يا ولد..

تربايتكون..على مبدأ الأسد أو نحرق البلد..