قصة و حكمة من زياد الصوفي.. 35

القصة:

رح أرجع معكون اليوم لكافيه الإنترنت اللي فتحتو بمنتجع الشاطىء الأزرق..

نهاية الاسبوع و اللبنانين بالعادة بيكونو آخدين نص الأوتيل.. و محل الإنترنت بأغلب الوقت مشغول فيهون.. يومها بعد الضهر أجاني أبو ثائر كبير مرافقين سامر الأسد بدو يحجز المحل بالليل لاحفاد المعلم و صحابهون..

بيجي الليل و بيدخلو سيسو و كيمو ولاد الأستاذ و معهون تلاتة صحابهون و أبو ثائر لحالو معهون..

قاعد أنا و صديق فرنساوي من أصول سورية جوا المحل و ضجة هالاولاد معباية الأوتيل..

قربت الساعة عنص الليل و الأولاد عم يلعبو، إلا سيسو ( إسماعيل) بيمد حالو على هالكرسي و بينام..

أبو ثائر وقع بين نارين.. نار يتركو لسيسو نايم و يجي المعلم يشوفو هيك، و نار أنو ياخود سيسو على سويت أهلو و يترك كيمو ( كمال ) بالمحل لحالو بدون مرافق..

لمعت بهاللحظة الفكرة الجهنمية براس أبو ثائر و بيقلي:

زياد الله يرضى عليك احمول سيسو و خدو عند أمو، هية بغرفتها..

قلتلو لصاحبي: احملو و خدو عند أمو عالسويت رقم 130 مافيني أترك المحل..

و الله بيشيلو لسيسو و بيمشي فيه..

دقيقة وحدة و بشوف من واجهة المحل سامر الأسد مارر و خطوة لقدام و وحدة عجنب من كتر مو سكران..

أنا ما فهمت بهاللحظة ليش أبو ثائر بيتكركب و بيركض برا المحل تارك كيمو لحالو..

أبو ثائر راكض ورا معلمو، و كيمو لحالو معي معي بالمحل، و صاحبي حامل السيسو و آخدو عند أمو بغرفتها..

ثواني تانية و بسمع صوت سامر عم يصرخ بالكوريدورات متل المجانين: يا أخو الهيك و هيك شو ما تعمل هون؟؟و اللللللللله تأعمل هيك و هيك من أختك..

و صوت الكف بيكسر هدوء الكوريدور.. و صاحبي راكض لعندي و أبو ثائر راكض وراه بدو يكمشو..

بطلع من المحل و بوقفو لأبو ثائر: شو في شو في؟؟؟

خود رفيقك فورا من هون، المعلم سكران طينة، و شافو جوا غرفتو لحالو مع المدام و طق عقلو..

بسكر المحل و باخدو لرفيقي برا الأوتيل..

حكيلي شو صار!!!!

المسكين مربوط لسانو و الدم عم ينزل من تحت عينو..

قلي: فتحتلي الباب بقميص نومها كانت نايمة و طلبت مني حطو بتختو.. أنا و طالع من جوا، و زوجها داخل و شافني بالصالون برا معها لحالنا و هية بتياب نومها، و طحش علي ضربني بوكس عوجهي و صار يسب علي… لما وصل أبو ثائر ضربني كف عنص وجهي و قلو لمعلمو: أتركلي ياه معلم لهالحيوان لاجعل الله ما خلقو..

تاني نهار من الصبح، بيجي سامر و أبو ثائر لعندي: وينو هالحيوان؟؟

سافر يا استاذ و ما بقا رح تشوف خلقتو بحياتك..

بينط أبو ثائر بيقلي: الله يوفقك يا زياد قلو للمعلم شو عملت أنا فيه..

والله يا استاذ ضربو هلكو ضرب، و رحنا عالمستشفى قطبنالو عينو بعد ما فتحلو ياها أبو ثائر..

اتطلع فيه وقلو: برافو عنك..

بنفس النهار صاحبي كسر إجازتو و راح عبيروت، و كل يوم يجي سامر يسأل عنو و يقلي: ما بقا بدي شوف خلقتو لهالحيوان هون، أو قسما بالله لاتلوم وقتها غير حالك..

سيسو كبر أكيد هلأ و صار شبيح.. و صاحبي ما كبر فيه شي من وقتها لهلأ إلا هالندب..

الحكمة:

هبت النخوة البركة عالأستاذ و انضربت أحاسيسو، لما شاف صاحبي لحالو جوا الغرفة آخد السيسو..

و ما خجل تارك ولادو بنص الليل لحالهون و هوة لاحق سكرو تنجيسو..