قصة و حكمة من زياد الصوفي.. 25

القصة:

بنات المسؤولين باللادقية و بنات بيت الأسد ملهيين من الصبح عند كوافيرية الشعر عم يزبطو أمورهون..و كلهون مستنفرين من الضهر عطاولات الكازينو بصلنفة ناطرين النصيب..

اللادقاني لما بيشوف هالشوفة بيعرف فورا أنو حدا من ولاد حافظ الأسد جاية عصلنفة و كل البنات طالعين أنو بركي بتزبط مع حدا فيهون و بتكون نصيب شي ولد من ولادو..

يومها بالتحديد الأربع شباب كانو فوق.. الخلف و السلف و أبو بيجاما و الهترة..مو بس لحالهون، جايبين معاهون كل صحابهون من الشام..بذكر واحد من بيت شيخ الأرض كان معهون..

الغرض من زيارتهون كانت سباق سيارات بين صلنفة و القرداحة..

باسل بالدودج الحمرا.. بشار بالشبحة.. ماهر بالبورش.. مجد عكيس النص بميرسيدس صغيرة معدلة..

الكل واقف بدو يتفرج عانطلاقة السباق، و هالبنات يا عيني العرق عم يشر من شعورهون المسرحة و الغيرة بعيونهون أنو كيف باسل اتطلع بوحدة و ما اتطلع فيها بالذات..

بلش السباق وانطلقو حماة الوطن..

سيارات بيومها بقيمة ميات الملايين، بالوقت اللي بكل صلنفة إذا بتجمع فيها المصاري بجيوب العالم ما في 10 آلاف ليرة..

ساعتين و بيرجعو هالصبايا اللبايا عالساحة.. الفرسان رجعو..

الدودج الحمرا بمقدمة الواصلين طبعا.. ما بيصير الرائد الركن المهندس المظلي الفارس الذهبي الحج باسل يخسر بأي شكل من الأشكال..

وصلوووووووو..

و هالبنات يقبرو أمهون نظرات الفخر و الاعتزاز بوصول الباسل بالمرتبة الأولى..

نزل من سيارتو و ما اتطلع بحدا..

التصفيق و التبجيل و إلى الأبد إلى الأبد يا حافظ الأسد..

بشار ما كان ألو قيمة بهداك الوقت.. لا حدا عبرو و لا حدا شالو من أرضو..و هالضحكة بالبلهاء مرسومة عوجهو..

مات باسل بعد بكم شهر.. و أتعدل الدستور عند بنات مسؤولين اللادقية بأقل من خمس دقايق..و الكل ناطر سباق الصيفية التانية، و البنت اللي كانت عم تعمل عملية زرع شعر لدقنها تيمنا بالباسل، صار بدها عملية تطويل رقبة تيمنا بالبشار..

الحكمة:

لتوصلي لقلب الرئيس، كان عليكي تلحقي الخسيس، مو اللي راح فطيس..