القصة:
اتغديت انا و رفيقي ببيت اهلي بصلنفة و قلي قوم ابو الزوز خلينا ننزل عالبلد نتسبح و بالليل منطلع لهون مرة تانية..
والله بدل ما ياخود طريق الحفة, اخد طريق القرداحة اللادقية قال منشان يفرجيني عالمنطقة..
وصلنا بعد بشوي ( بعيد الشر عن البكون ) عالقرداحة.. كانت اول مرة بحياتي بشوفها.. ناس كلها معصبة, كلو بيزور, ما حدا عاجبو شي, و الكل ناطر يصير خناءة…
راح قلي رفيقي, اسمنا هون و هون تعا نتفرج عقبر حافظ الاسد..
وصلنا لهونيك.. ريحة البخور, و حرس معبى المنطقة, و دفتر كبير عباب المقبرة لتسجيل ذكرى زيارتك الميمونة..
اجا واحد من عن الباب و سأل: من وين الشباب؟؟
قلتلو من اللادقية و جايين من صلنفة نزور ضريح القائد الخالد..
و قفت ربع ساعة عالضريح و انا رافع ايدي عم ادعي لرب العالمين.. و رفيقي واقف صوبي مل من طول النطرة..كل شوي يتطلع فيني و انا بعدني واقف عم ادعي..و ما عم يسترجي قدام كل هالجحاش الموجودة يقلي يللا حاجة بقا..
المهم خلصت دعائي و مشيت..
و رفيقي المسكين عم يلعن الساعة اللي قلي فيها تعا نتفرج عالضريح..
و صلنا عالسيارة و هوة لوقتها ما عم يسترجي يسالني او يفتح تمو بحرف..
لما قطعنا مفرق القرداحة قلي: و لو الله… كل هالأد بتحبو لحتى ضليتك واقف عم تقرالو الفاتحة نص ساعة؟؟؟؟
اتطلعت فيه و ضحكت: قلتلو و الله يا ابو فلان ما تركت تحشيكة بتنفعو و ما بتنفعو الا قرطتو ياها بدانو… ما تركت دعوى بالحرق تنزل على روحو الا دعيتها.. ربع ساعة يا ابو فلان و انا عم سبو لحافظ الاسد بنص دانو و هوة متل الهترة عم يسمعني و لا قادر يعمول شي..
الحكمة:
كتر متة و بيرة هالكم يوم… فساعة الفنترة ما بقيانلها كم يوم…
