قصة و حكمة من زياد الصوفي… 127

القصة:

انتشرت قصة باللادقية بالاسبوع اللي لحق جنازتو لحافظ الاسد, أنو بشار بعد الدفن جمع شباب بيت الاسد كلهون و خلّا ماهر يضربهون كل واحد كف و عطاهون محاضرة أنو هوة مو متل أبوه أبداً: أبويي كان عسكري, أما انا طبيب, و الطبيب لمّا بيواجه سرطان بيستقصلو من جذرو..باشارة من بشار أنو ما رح يسمح لأولاد عمو أنهون يشبحو بالطريقة اللي كانو يمارسوها أيام الاسد الاب..

هالقصة انتشرت كتير يومها, و روجها المخابرات بالتأكيد, منشان يسوقو لبشار أنو جاية بوجه تاني و يحاولو يمصّو صدمة توريثو السلطة بخمس دقايق..

قصة أنو انضربو شباب بيت الاسد صحيحة مية بالمية, بس مو منشان السبب اللي انتشر..

حكاية اليوم بتخبركون ليش ولاد بيت الاسد أكلو كف كف عالماشي يوم دفن حافظ الاسد..

فطس حافظ الاسد, و طلعتلو جنازة هائلة عفوية بالشام.. و من سوء حظي و بحكم خدمتي الالزامية بمراسم الجيش يومها, كان لا بد من أنو شارك بهالجنازة..

منمشي من قصر المهاجرين لمفرق دمر و نحنا عم نعزف نشيد الشهيد و نشيد الموت.

بيطلع التابوت على قصر الشعب و منّو لمطار المزة العسكري ليتوجهو بعدين لمكان طمر الجيفة بمقبرة العيلة بالقرداحة..

كل الوفود الرسمية سبقت التابوت عالقرداحة.. سفراء و وزراء و رؤساء دول اللي ما طلعو على قصر الشعب, كلهون اتوجهو لمكان طمر الجثة..

القرداحة كبلدة صغيرة ما بحياتها شهدت هالكم الهائل من الرسميين, و لا حتى بيوم دفن باسل أو الناعسة..

سيارات من كل الانواع, المفيّم و الدبلوماسي و اللي بلوحات و اللي بدون لوحات.. أهل القرداحة اللي معودين يشوفو هيك نوعية من السيارات بحكم وجود شي مليار ضابط درجة أولى من مدينتهون, بس أنهون يشوفو سيارات من هالنوعية و ما باتخص ولاد ضيعتهون, فهاد الشي اللي ما كانو متعودين عليه..

بتوقف هالسيارات بكراج مخصص للوفود الرسمية, بما أنو بيومها ما كان في شي جاهز نتيجة التسريع بالدفن منشان تخلص عملية التوريث بدون أي مفاجآت..

بعد الصلاة عالميت, و بعد دعاء البوطي و تأكيدو أنو الاسد رح يكون بالجنة, بيتجهو الوفود الرسمية باتجاه سياراتهون لياخدو طريق الرجعة عالشام..

سيارات عم اتغادر المدينة من كل الاتجاهات, الا السفير البلغاري مع شوفيرو بهالكراج عم يدوّر على سيارتو المرسيدس الشبح الرمادي ..

نص ساعة و هنن يدورو, ما بيشوفوها.. فبيمشي السفير لعند فاروق الشرع و بيخبرو أنو سيارتو اختفت و ما عم يشوفها, و أنو هوة متأكد أنو السيارة انسرقت..

بينفي بشكل كبير الشرع و بيطالبو بالتدوير عليها مرة تانية..

بيعصّب السفير و بيطلع صوتو قدام باقي كل الوفود و بيهددو لفاروق الشرع أنو بحال ما رجعت السيارة رح تصير أزمة بين الدولتين..

بيركض الشرع و بيخبرو لجميل الاسد الحاضر بجنازة أخوه..

سيدي سيارة السفير البلغاري اختفت, و السفير عم يتدعي أنو حدا من البلد هون سرقها..

جميل بيعرف كتير منيح أنو هارون الاسد هوة الوحيد اللي بيطلع معو هيك شي, فبيبعت كلابو لجيبوه, و بيخبرهون يقولولو: معك خمس دقايق لتجيب السيارة وين ما كانت تكون..

بالفعل بيجي هارون و معو السيارة, بس المشكلة أنها كانت مضروبة بجنبها اليمين..

هون جميل بيسلّم السيارة المضروبة للسفير و بيعتذر منّو و بيحكيلو هالقصة فوراً لماهر و لبشار..

بينتظر ماهر كل الضيوف يروحو, و بيجمع كل شباب بيت الاسد جوّا غرفة مسكرة..

بيصفهون صوب بعض و على عين أخوه بشار و عمّو جميل بيضربهون كف كف لكل واحد عالماشي..و بيقلهون:

زمن حافظ الاسد خلص اليوم, و الدلال اللي كنتو عايشينو خلص معو..

و بالفعل كان ماهرمعو حق هالمرّة، بعد حافظ الاسد خفت سطوة عيلتو، بس طلع مكانها ظاهرة المخلوف و جمهورية سيرياتيل..

الحكمة:

خدو إجازة من سرقة السيارات و تجارة المورفين..

ولك هارون انتظر كم يوم بس ليخلص الأربعين….زياد الصوفي – مفكر حر؟