قصة وحكمة من زياد الصوفي..80

القصة:

سألني البابا لما كنت صغير، شو بدك تصير بس تكبر حبيبي؟؟ قلتلو مهندس..

كلياتنا أهالينا كانو يفتخرو فينا قدام رفقاتهون لما يسألونا هالسؤال..

في مننا مين حقق حلمو، و تانين كانو ضحية علاماتهون بالبكالوريا..

بس الأكيد، اللي صار مهندس فينا ما قرر بين ليلة و ضحاها يصير دكتور على سبيل المثال..

فواز الأسد بليلة وحدة قرر يصير محامي.. بيبعت ورا نقيب المحامين و بيخبرو أنا قررت أعمول محامي، و من هلق و رايح رح اترافع عن المظلومين و صغار الكسبة..

الدكتور المحامي فواز الأسد..

يافطة اتركبت على صدر مكتبو بشارع بغداد، و العالم ما مصدقة اللي عم تقريه و تشوفو تاني نهار..

أول قضية لفواز كانت من أكتر القضايا المثيرة للجدل بالقصر العدلي..

أبو علي.. شبيح من ضيعة دمسرخو، كان عم يشتغل مرافق عند فواز الأسد بنص التسعينات..

بليلة ما فيها ضو قمر، بيركض لعند فواز و بيقلو: النيابة يا معلم طالبتني، و الشرطة قايمة و قاعدة بالضيعة ما يدورو علي..

أبو علي كان متورط بقضية تشكيل عصابة مسلحة..

شافها فواز فرصة مناسبة لإبراز مهاراتو الدفاعية و ممارسة دور المحامي من بوابة أبو علي..

روح ولك جحش سلم حالك و أترك الباقي علي..

بس يا معلم هنت بتعرف، إذا دخلت عالسجن بهالقضية، و الله غير الله ما بيطلعني..

المهم بيسلم حالو أبو علي للعدالة و بتتحدد محكمتو بعد 45 يوم..

أبو علي عفن بالسجن هالشهر و نص، و ما كان مصدق أيمات تجي المحاكمة حتى يخلصو المتر فواز..

بيدخل فواز على المحكمة، القاضي ورا مكتبو، و القفص مليان متهمين و من بينهون أبو علي..

بيصرخ أبو جميل بالشرطي: و لك فتحلي باب هالقفص تشوف..

و بيدخل أبو جميل لجوا القفص، و بينزل قتل بأبو علي..

ولك فدان هنت؟؟ و لك يا حيوان أبتعرف أنو هيدي بلد قانون؟؟

كف ياخدو لأبو علي و لبطة ترجعو..

بوكس يشيلو، و رفسة تحطو..

القاضي قاعد عم يتفرج عهالمسرحية، و عم يراقب فواز كيف عم يرافع عن موكلو أبو علي..

يا سيادة القاضي يا حضرات المستشارين: خلص هالكر عندي أبقا بيعيدا.. عكفالتي هالمرة..

طلاع ولك جحش، و حسك عينك مرة تانية تشكل عصابي مسلحة..

الحكمة:

شعارنا..

نصاب..مجرم.. حرامي..

ما الك إلا أبو الفوز المحامي..