القصة:
و مين قال الفقر عيب؟؟؟؟
و مين اللي قال أنو الجهل مصيبة؟؟؟
بس العيب و المصيبة لما بتنسى أصلك و فصلك، و بتحاول تلّون حالك بطريقة ينسو الناس فيها تاريخك..
سوريا بشكل عام و اللادقية بشكل خاص هية ارض خصبة لتبييض تاريخ العوائل… مجتمع صغير و بيتأثر بمحيطو بشكل مباشر و سريع، و ظروف المدينة في ظل الاسد ساهم على تفضيل الجاهل الغني على المثقف الفقير…
اسماء كتير لمعت باللادقية عحساب عائلات انطفت اجتماعياً، و من حيث قوة التأثير الايجابي بالمجتمع، و الأمثلة كتيرة، بس ما رح ندخل بهالمهاترات اللي ما بتغني قضيتنا، و رح انضل باطار البحث بتاريخ عائلة الاسد، و كيف بسحر ساحر اتحولت من اكتر العائلات المهمشة بسوريا ، لصاحبة السلطة و المال المطلق…
حكاية اليوم بترجعنا لتاريخ هالعيلة، و وين كانو و وين صارو…و السؤال اللي الكل بيعرف جوابو: كيف صارو؟؟
و برجع بذكّر انو لا الفقر و لا الجهل عيب، فأنا أفقر من أي قارئ لهالقصة، و أجهل من اللي فتح صفحتي و ما عم يعرف يفك الخط…
أثناء تولي حافظ الاسد لوزارة الدفاع في سوريا، بالصدق و من كتر ما أهل هالبلد بسطاء و مانهون طائفيين ، ما أخدوه على محمل الجد، و تركوه يقعد على راس المؤسسة العسكرية بدون ما يعتقدو للحظة أنو هالشخص رح يغير وجه سوريا الحضاري و يحولو لضيعة عم تنهش فيها كل مطامع الارض…
طه قاسم ، خياط مشهور جداً و معروف بكل نواحي بانياس، ما في عائلة بهالمدينة الا بتروح و بتفصل تيابها عندو…
هوة و قاعد بمحلو بوسط المدينة ، بيدخل لعندو مساعد بالمخابرات بيشتغل عنصر أمن بمصفاة بانياس..
يعطيك العافية يا معلم..
اهلا و سهلا اتفضل…
الله يوفقك لازملي بدلة اذا عندك وقت اتفصللي ياها…
ايه من عيوني، اتفضل آخدلك مقاسك…
خلصت البدلة و ضل هالشب يتردد، على محل طه كل الوقت بعد ما نشأت علاقة صداقة بيناتهون…
جميل الاسد أخوه لوزير الدفاع السابق حافظ الاسد صار من أقرب اصدقاء الخياط طه و صار أغلب وقتو يقضيه بعد الدوام عند هالخياط يتفرج عالرايح و الجاية، و يسمع اخبار البلد من كل زوار طه…
و من شدة فقرو لجميل، رفض طه ياخود منو أجار تفصيل البدلة..
بعد اصرار شديد من جميل الاسد بدعوة طه لغدا ببيت أهلو بالقرداحة، لبى الدعوة بيوم جمعة و طلعو من بانياس على هالضيعة بجرود اللادقية…
بيستقبلو جميل بحفاوة أهل الضيع، ببيت اهلو المتواضع و بيقعد بارض الديار معو عم يشربو شاي و ياخدهون الحديث من سيرة لسيرة…
فجأة بيقاطعهون صوت عجوز شمطاء:
واااااا جميل وااااا حيوان…
و بتطلع من الغرفة المقابلة لغرفة القعدة ست ختيارة لابسة من الشراطيط ألوان، و جرابات خضر للركبة، و تنورة مزركشة بالاحمر و الاصفر و البني…
بتبدا تصرخ بجميل اللي قاعد مع ضيفو…
ولك حيواااان، يلعن ابوك كلب ابن كلب، ليش حاطيط معالف البقر عحرف الشباك ولااااا؟؟ و لا هنت كر يعني أبتفهم؟؟؟
اتطلع طه عالمعالف اللي قاصدتهون السيدة ناعسة قدس الله سرها و هوة مستغرب أنو كيف جميل بيعمل هالعملة، بيتفاجأ بقصوص ورد و زريعة مصفوفين عحرف الشباك..بيتطلع طه فيها بذهول و استغراب، و وجهو لجميل الاسد ما بيتفسر من خجلتو من هالختيارة الخرفانة…
بيصرخ بأمو صوت:
ولك فوتي جوا بهدلتينا قدّام العالم، فوتي يلعن بو ضيعتك…
و بيدير وجهو لعند طه و بيبتسم بخجل و هوة عم يحاول يلفلف البهدلة اللي اتعرضلا من موقف الناعسة و بيقلو:
لا اتدقق خيي طه، ولك هيدي أمي مخرفي شوي هالايام و ما عم نخليها تطلع برا البات منشان ما تبهدلنا…
هيك تحفة نادرة متل ناعسة، ما كان غريب عليها ابدا انجاب هيك سلالة من العلم و الثقافة و حب الوطن…
انك تكون فقير و تصير غني، حلال عألبك..
انك تكون جاهل و تدّعي الثقافة، شطارة منّك..
بس أنو تكون فقير و جاهل و بدك تغنى و تدّعي الثقافة عحساب افقار و تهميش المجتمع، فإلك منهديك ثورة الكرامة و استرداد الحقوق..
فتحمّل أغنياء الشرف و الضمير يا عديم الشرف..
الحكمة:
ركبولك هالة فوق راسك و سمّوكي قديسة..
وحدة خلفت مجرمين متل رفعت و حافظ، مو قديسة، هيدي فطيسة..
