القصة:
الشبيحة باللادقية الهون مواصفات بتختلف تماماً عن مواصفات الشبيحة بباقي المحافظات…
شبيحة اللادقية جامعين الحيونة مع قلة الاخلاق مع الاجرام مع كل شي في مواصفات سيئة بتخطر عبالكون…
هالشي صحيح ما بيميزهون عن باقي شبيحة المدن، بس الشي اللي بيتوج جملة اجرامهون هوة مجرد انتماءهون لعالعيلة القذرة…
فواز و منذر و لاد جميل…
هلال و هائل و هارون ولاد أنور…
و الباقي من هيك نشح من اولادهون و احفادهون و الالعن عالاطلاق هنن زباينهون..
بتسألوني شو معناة زباين شبيحة الاسد؟؟
هنن الرعاع اللي عايشين من فضلة هالشبيحة، و مع الاسف بيختاروهون اختيار من حثالات و ضعاف النفوس من كل الطوايف…
و الامثلة كتيرة على مر تاريخ هالعيلة، بس ما بدي ادخل بمهاترات مع ناس أقل شي ممكن ينوصوفو فيه انهون حثالة المجتمع…
القصة اليوم من اللادقية كمان، قصة صارت احداثها بنص التسعينات…
فواز الاسد ( ابو جميل ) بعد ما اتزوج بنت الحسن ، اجاه ولدين : جميل و الملقب بجيمي ،و بنت سمّاها جودي….
ابو جميل طار عقلو بجودي لدرجة انو ما يسمح لبني آدم يقلها لأ على أي شي…. لو جودي خربت الدنيا فذنبها مغفور لو شو ما كان يكون…
بتكبر هالبنت و بيصير عمرها خمس سنين، و ما نشوفو لفواز الا حاطط هالبنت بحضنو بالسيارة و عم يلف فيها بالبلد ، و يا ويلو و يا ظلام ليلو اللي بيتجرأ و بيتطلع فيها لهالبنت…
الحثالات اللي حكينا عنهون ببداية القصة اليوم من زباين فواز كانو كتار بالبلد، و بعد جودي صار استرضاء فوار من اسهل مايكون، بيكفي لحدا من هالزبالات يمدح بهالبنت لحتى تشوفو فواز عم يغدق عليه من مكارم بيت الاسد…
اكتر شي كان يحبو بهالبنت هوة شعرها المكزبر اللي وصل تحت كتافها، و لو تسمعوه لفواز كيف عم يتغزل بشعر هالبنت بتقولو ما معقول فواز بكل هالرقّة….
بينزل عمكتبو الصبح و بيترك هالبنت بحضن امها بالبيت و بيروح ليمارس نصبو و تشبيحو عولاد الناس…
بيجيه التلفون العجيب من البيت…
الحاق يا استاذ فواز، الكوافير هون و عم يقص شعرات الست جودي…
فواز موصّي الخدامة عندو بالبيت، اي شي بيصير مع هالبنت بتتصل فيه بدون ما تعرف مرتو و بتخبرو اللي عم يصير…
شعرات جووووووووودي ؟؟؟؟؟؟
ايه تأجعل الله ما خلقو لهالكوافير و لمرتي بنفس الوقت…
بيركب بسيارتو و بيطير عالقصر بمشروع الزراعة، بس اللي كان بدو يصير مع الاسف صار و طارو شعرات الجودي…
بيدخول عالبيت و بيشوف الكوافير أحمد ( صالون النصف الاخر ) ، و أحمد كان بوقتها اشهر كوافير بالبلد، الكوافير المخصص لنسوان الشبيحة و عائلات الشبيحة و جيران الشبيحة، يعني مقص أحمد شايل شعر كل نسوان فدادين بيت الاسد و ما لف لفهون…
بيدخل فواز متل التور الهايج…
ولك حيوان شو ما تساوي هون؟؟؟
احمد المسكين الا شوي رح يبلل تحتو، و من خوفو جاوبو:
يا استاذ و الله ما عملت شي لمرتك و لا لمستها…
ولك حيوان مين سألك عن هالحيوانة هلق ؟؟ليش قصيت شعرها لهالبنت؟؟؟ ايه و الله تأجعل الله ما خلقك….
بيندار على مرتو و بيقلها: و هنتي يا بقرة حسابك بعدين، بس خلص من هالطنط…
بيربطو لاحمد بالكلبشة على بلكونة بيتو، و بيصرخ صوت بكل خلق الله اللي مارين تحت القصر : اتطلعو على هالحيوان كيف بدو يموت و هيدي نتيجة أي حدا بيفكر يأذي بنتي…
و بيمسك فواز المقص الملوث بشعر نسوان الشبيحة و بيخرطلو لاحمد شعرو عالصفر، و مع كل ضربة مقص كان الكف عم ينزل على وجهو لهالمسكين اللي ذنبو الوحيد انو سمع كلام بنت الحسن و غض نظر عن كلام ابن الاسد…
و بيصرخ صوت لجودي بنتو : و لك جودة حياتة، تعي يا عان بييك…
و الله بتجي هالمسخة الارض لعند ابوها و بتوقع بحضنو الدافي…
اضربيه لهالحيوان اللي قصلك شعرك…
بلشت جودي بضرب الكف و اللبط على وجهو لأحمد و فواز ضحكو واصل لآخر شارع الزراعة اللي ساكن فيه…
بعد القتلة و البهدلة و الاهانة لهالكوافير، بيفكلو الكلابشة و بيقلو:
ليك يا حيوان، لولا بنتي كانت هون، و حق الامام و علي ما بتطلع الا قلبك محمّل على جثتك، بس أبدي أعمول هاكا منشان نفسية و مشاعير بنتي..
بيختفي احمد تلات شهور عن الوجود ما حدا بيعرف عنو شي، و الصالون بيتسكر حتى اشعار آخر ، و كلو منشان شوووووو؟؟؟ غلط جوابكون هالمرة، مو منشان الحريي، منشان شعرات هالجقلة بنتو لفواز…
الحكمة:
تعّبت حالك يا أحمد لتعملها لجودي تسريحة آخر صرعة…
بنت فواز شبيحة ما بيلبقلها الا دقن سودا و وشم و راس عالقرعة..زياد الصوفي – مفكر حر؟
