القصة:
كتار من الناس بيستغربو و أنا منهون، أموال صدام حسين و أولادو وين اختفت؟؟
هلأ في شي أكيد رجع للحكومة العراقية، و شي ضل مع البنات و الزوجة، و الشي الكبير اتهرب بشل مفضوح و دخل بحسابات مافيوزات سوريا…
حكاية اليوم صادمة شوي، و فيها شوية تداخلات نتيجة كتر الاسماء اللي اشتركت بنهب مين نهب العراق…
اشتد الضغط على صدام حسين و أولادو، و حس أنو الضربة الاميركية صارت عالابواب، و وجودو ما بقا محل ترحيب من العالم كلو..
لتأمين المال المنهوب من الخزنات العراقية و من نفط العراق على مدى طول السنين، شاف أنو سوريا هية الملاذ الآمن لهيك نوعية من المال الوسخ ، نتيجة تشابه نوعية الانظمة و نتيجة تطمينات الجانب السوري أنو المال رح يكون بالحفظ و الصون…
اتشكلت لجنة عالحارك من الجانب السوري و كان على راسها طريف الاخرس و مفيد شوكت و ذو الهمة شاليش…
و اعتمدو المصرف التجاري فرع ٥ لتسهيل أعمال نقل المال و تحويلو عشكل ودائع طويلة و قصيرة الأجل ، مقابل عمولات هائلة كانت تصرف من الجانب العراقي…
و من ضمن أعضاء اللجنة المصغرة كان في موظفة اسمها ريم طهماز بتقوم بالتنسيق بين اعضاء اللجنة الكبار و بين المصرف التجاري… سيدة متزوجة من شب اسمو محمد مخلوف ( أخوه لهاني مخلوف رئيس نادي القرداحة )…
و بأحد صفقات هاني مخلوف و من خلال برنامج ما يسمى النفط مقابل الغذاء، بيتصل بأخوه و بيقلو يخبر مرتو ريم أنو اتسرع بصرف الكشوفات ، الصفقة ما بتتجاوز الفرنكات بمقابل المليارات اللي كانت عم تنصرف، و كان من نصيب الست ريم ستة مليون دولار عمولة، و هاني طلع بعشرة مليون دولار، و الباقي راح للجنة العراقية السورية…
هاني مخلوف صديقو لجورج وسوف، أقنعو أنو يدخل بهاللعبة اللي ما في منها اي مخاطرة و ارباحها مضمونة ، و بيكفي يا جورج انك مسنود بابن المخلوف…
بيجتمعو ببيت الوسوف بالكفرون، و الهبرة هالمرة كانت ٢٥ مليون يورو…
الوسوف باللحظة الاخيرة انسحب و ما راد يدخل بكل هالموّال، فقام هاني مخلوف و ضربو ببيتو بالكفرون و وصلت يومها صواتو لآخر الدنيا و هوة عم ياكول القتلة…
نتيجة القتلة اللي اكلها الوسوف من المخلوف، اشتكى جورج لذو الهمة الشاليش، ، قلو انو هاني مخلوف ضربو ببيتو بالضيعة…
بيتصل الشاليش بالمخلوف و الوسوف و بيجتمعو بحضور مجاهد اسماعيل اللي كان عم يموت يطلعلو شي من هالقصة، بس ما قدر ياكول شي لأنو صرصور مقابل هالحيتان اللي كانو عم ينهشو بهالجثة المعفنة..
سقطت بغداد…
و اتشكلت لجنة اميركية عراقية ( السومو ) ، و مهمتها ملاحقة مال صدام حسين و اولادو…
و بدون تعب و بذل جهد، بيبعتو للحكومة السورية اسماء كل الناس اللي اتورطت بتهريب المال العراقي، و على راسهون ذو الهمة شاليش، و من ضمن اللائحة الطويلة بالمناسبة ، كان الوسوف مذكور فيها…
بتشكل الحكومة السورية لجنة وهمية للتحقيق، و بتكشف عن اشياء ما ممكن لعاقل انو يصدقها…
الموظفة ريم طهماز اللي كان راتبها بهداك اليوم 9000 ليرة، كانت حصتها من هالقصة 25 مليون دولار كاش بحساباتها، و فيلا بالمزة و سيارتين اكس فايف…
أما صاحب الهبشة الكبيرة فكان ذو الهة شاليش ب 440 مليون دولار، و ما بين ريم الصغيرة و ذو الهمة الكبير ، عشرات الاسماء اللي لتاريخ اليوم عم ينعمو بخيرات العراق المنهوبة…
الموضوع اتسكّر طبعاً من قبل الحكومة السورية، و ما عاد حدا حكي فيه، بس ملف دعوى استرداد الأموال المنهوبة جاهز بأدراج المختصين بانتظار اللحظة المناسبة..
الحكمة:
مال بلاد الرافدين انسرق و اتحوّل لخزنات بلاد الشام..
انشالله منشوف ولاد حافظ ، بنفس مصير ولاد صدام.زياد الصوفي – مفكر حر؟
انت كذاب. واناتونسي. قصتك فاضية وكذب مبين ياغبي.
زياد الصوفي …أيها المنحل أخلاقياً البغيض الطائفي النتن …سنأخذ الحكمة منك أيها الإانبطاحي