قصة وحكمة من زياد الصوفي..126

القصة:

لما وعينا عالدنيا الكل ما بيعرف من اولاد حافظ الاسد كلهون الا باسل الابن البكر..

باسل اللي اتربى على ايدين عمّو رفعت بقصر اللادقية, و علّمو من فنون الاجرام و الخبث الشي اللي بيأهلو ليقود هالعيلة..

و باسل شخصيا كان معجب كتير برفعت, لدرجة أنو كان يفضل يضل مع عمو باللادقية بكل فترة الصيف لما كان صغير و يترك عيلتو بالشام..

حاول حافظ الاسد بفترة من الفترات و نجح أنو يسّوق لابنو باسل منشان حفلة الوراثة, و كان حافظ مقرر ضمنا أنو يسلّم أبنو الحكم أثناء حياتو, بس حكمة رب العالمين اللي أبعدت هالمجرم عن كرسي الرئاسة..

لما مات باسل, طلع نجم بشار..

بشار الولد اللي كل رفقاتو بالمدرسة كانو يضحكو عليه ضمنا, و كل أخواتو بالبيت مع العيلة كلها ما حدا عاطيه أي أهمية بسبب خفة عقلو, اللي سببتلو بالنتيجة حالة من انعدام الثقة بالنفس و التشكيك بكل المحيطين فيه لاحقا..

لما بشار ورث باسل, ورث حتى رفقاتو..

كل اصدقاء باسل الشباب و الصبايا صارو حكما رفقات بشار, و بدي هون يلمع نجمو ويظهر عالساحة بعد ما كان جزء كبير من الشعب السوري ما بيعرفو حتى بالشكل..

و حكاية اليوم من بانياس عن هالموضوع بالتحديد..

نبيل عباس شب بانياسي بسيط و من عيلة فقيرة،و نتيجة علاقة عمّو بأحد ضباط المخابرات المتنفذين بطرطوس, قدر يوصّلو ليشتغل حارس بقصر حافظ الاسد ببانياس..

شب من عيلة كافي خيرها شرها , حالتهون الاجتماعية ما سمحتلو يكفي علمو و لاسمحت لعيلتو يبعتوه و يتكفلو بمصاريفو متل جزء كبير من أهالي بانياس..

قصر بانياس عادة بيجي عليه حافظ الاسد أو احد ولادو مرة كل شي خمس سنين, لدرجة أنو موظفين القصر بالكاد بيقدرو يميزو حدا من هالعيلة القذرة حتى لو مر من قدامهون..

بيوم من أيام صيف 90 و بأحد مناواباتو على حاجز القصر..بتمر رباب بنت عمّو , بترمي السلام على نبيل و باتضلها مقطعة الحاجز..

بهالاثناء, بتمر سيارة ميرسيدس سودا و عليها نمرة دمشق و بيصير الشب اللي راكبها يلطشها لرباب..

شب صعلوك لابس بروتيل اسود و حاطط نضارة شمس مخباية كل وجهو..لما ما بترد عليه هالبنت و لا بتاخود بتلطيشو, بينزل من السيارة و بيقرب عليها بمحاولة أنو يخليها تركب معو بالسيارة و ياخدها..

نبيل ضرب فيه شرش النخوة البانياسية و طحش عهالشب و بدي ضرب فيه بدون ما حتى يحسب حساب مين هوة اللي عم يضربو..

ما ترك مغز ابرة بجسمو لهالأزعر الا علّم عليه بكف أو ببوكس, و هالشب متل الخروء ما عم يعمل شي الا عم يصرخ لحتى حدا يساعدو و هو عم يهددو لنبيل باللي ناطرو بعد هالقتلة..

البنت بتهرب من المنطقة, و شباب القصر بيركضو على اصوات هالشب اللي عم ياكل القتل..

مدير القصر من بيت زيود, لما بيشوفو لنبيل رح يموتو من القتل لهالكلب بيركض ليخلصو, و بيتفاجأ أنو بشار حافظ الاسد هوة اللي عم ياكلها و ما مبين من وجهو شي من كتر القتل..

بياخدوه لنبيل بالسيارة على فرع الامن العسكري بطرطوس, و بيخبرو أبو سليم بالشام أنو بشار عامل مشكلة ببانياس و هوة بالقصر بانتظار أي أوامر..

بتجي هيلكوبتر و بتاخدو لبشار عالشام, و بيسحبوه لنبيل على فرع التحقيق العسكري بالعاصمة بتهمة القتل العمد مع سابق الاصرار..

بيستلم القضية علي يونس اللي صار لاحقا رئيس شعبة المخابرات, و كل يوم يعطي أوامرو بتعذيب نبيل و حرمانو من الاكل و من الشرب لحد ما يشوفوه وصل لحافة الموت..

ست شهور و ما حدا من عيلة نبيل بيعرف عنو شي, و ما ضل ضابط بطرطوس و بانياس ما سأل عنو.. حتى علي دوبا ما استرجى يحكي فيه خوفا من ردة فعل حافظ الاسد اللي ترك قضية نبيل بايد هالمجرم علي يونس..

أربع سنين مروا على نبيل و هوة بالسجن, ليوم اللي مات باسل الاسد..

بيطالع حافظ الاسد عفو عام عن كل المجرمين و اصحاب الجنح, و نبيل متهم النخوة و الضمير ما حدا يسترجي يفكر يطالعو..

عشر سنين مروا, و مات حافظ الاسد.. و استلم بشار من بعدو اللي عمل عفو عام تاني و ما شملو مرة تانية لنبيل .. و ضل بتهمة الضمير سجين عند قليلين الضمير لحد ما رب العالمين بالسنة ال 12 طالع عفو عنّو و أخدو باذن الله على جنتو..

الكل اتفاجأ بالايميلات الخاصة اللي اتسربت لبشار الاسد و اللي بتوضّح العلاقة المرضية لهالمخلوق تجاه الجنس الآخر، الا أهل بانياس ما حدا فيهون اتفاجأ ، فتحربة رباب و نبيل عالقة لهاللحظة بضمير البانياسليّة..

ورقة نعي نبيل لهلأ محتفظين فيها ، الورقة اللي ذكرتني بهالقصة.. 

ننعي إليكم شهيد النخوة و الضمير

نبيل محمد عباس

الحكمة:

لو كل الناس كان عندها نخوة نبيل.

كنّا شفنا بشار عم ياكول قتلة من ابن عمها لهديل…زياد الصوفي – مفكر حر؟