قصة وحكمة من زياد الصوفي.. 120

القصة:

أد ما درت و رحت و جيت, ما فيني ما ارجع على مدينتي اللادقية..

اللادقية المهمشة اعلاميا و اللي كل أهل سوريا مديونة الها بشيل قذارة عيلة الاسد عنهون طوال خمسين سنة..

مدينة اللادقية مدينة عريقة كتير و عمرها من عمر التاريخ, و عوائلها معروفين بالاسم و بالتاريخ و بمدى التأثير على واقع هالمدينة..

بتمشي بالشارع بيلاقيلك السمان بالصباح الخير, و الخباز بالله يعطيك العافية, و الجارة بالله يوفقك و يبعد عنك ولاد الحرام و التاجر بالعوافي يا أمير..

بلد من طول عمرها ما بتعرف اتمييز المسلم عن المسيحي, و السني عن العلوي, لحد ما اجو بيت الاسد، و لتدعيم وجودهون بسوريا بشكل عام و باللادقية بشكل خاص, بديو يفرقو الاهالي و يقسمو اللادقية بشرقها و غربها, لحتى وصلنا ليوم صرنا نشوف فيها احياء ملونة بلون واحد بس , هالشي اللي ما كان ابدا موجود قبل حكم الاسد..

وجوه و شخصيات كتير مهمة و الها تأثير كبير على المجتمع اللادقاني و السوري اختفت بحكم التهميش بالبداية, و المحاربة لاحقا..

و الدليل على هالموضوع, حكاية تمثيل شعب اللادقية بما يسمى مجلس الشعب..

لو بتشوفو مين بيمثل اللادقاني بهالمجلس رح تفهمو علي..

بديت الثورة بنص آذار 2011 و طلع الشعب السوري عالشوارع منشان المطالبة بحقوقو المشروعة بالعيش بكرامة و حرية..

المواجهة الأمنية حكينا عنها كتير, اليوم حديثي عن المواجهة السياسية للدولة لمطالب الشعب السوري و كيف اتعامل مع هالموضوع سياسيا و اجتماعيا..

بعد خطاب بشار الاسد الاول من مجلس الشعب و باطار الضحك على الشعب السوري, قرر جملة من الاصلاحات الترقيعية أنو بركي بيقدر يهدّي الشارع, و من ضمن هالمقررات كانت انتخابات برلمانية مبكرة بيشارك فيها كل اطياف الشعب السوري..

بتتفاجأ دوائر الدولة الرسمية و غير الرسمية باللادقية بالكتاب الواصل من القصر الجمهوري بالشام و اللي بيقضي بوضع كل امكانيات هالمؤسسات بتصرف اتنين من المرشحين لمجلس الشعب و العمل على ضمان حصول هالمرشحين على اكبر عدد من الاصوات للوصول للقبة البرلمانية..

من كل أهل اللادقية الاصليين, و من بين كل مثقفين البلد , و من بين كل عوائل البلد , كان الحيار على هالاسمين:

عمار بديع الاسد..

علي بسام مخلوف..

ايه ايه ليش مستغربين.. اصلاحات بشار كانت بتقضي على وصول نقيب المهندسين باللادقية عمار بديع الاسد و على وصول قرايبو من أمو علي بسام مخلوف..

عمار بديع الاسد ( 42 سنة ) نقيب المهندسين باللادقية و أبوه بديع هوة ابن عم بشار الاسد..

حصد ملايين الدولارات من خلال ادراتو لسنين طويلة ادراة العمليات بمرفأ اللادقية , و استفاد من هالمنصب من بداية عام 2010 على تسهيل عمليات التهريب المنظمة على مدينة اللادقية من جهة البحر, مقابل عمولات بملايين الدولارات..

ومن خلال هالمنصب أدار شبكة مافيا على مستوى عدد من المحافظات لتوزيع البضاعة المهربة لصالح تجار وصناعيين بهاللمحافظات ، وبيلعب أخوه “نمير” دور “المدير التنفيذي” لهذه العصابة. اللي بيجبر المخلصين الجمركيين ومكاتب التخليص الجمركي الخاصة لسطوتو ، و بيجبرهون على دفع نسبة معينة من عائدات عملهون لحسابو الخاص، الشي اللي كان يقوم فيه ابن العم جميل الأسد عن طريق “شركة الساحل” للتخليص الجمركي لسنين طويلة كتير قبل ما رب العالمين يقصف عمرو..

أما المصدر التاني لثروتو المنهوبة فهوة “مشروع لاوديسا” السياحي اللي بتشرف عليه نقابة المهندسين بالمحافظة، واللي أصبح وحدة من أقذر قنوات النهب والفساد بالمدينة…

عمار الأسد متل ما قلنا هوة ابن بديع الأسد( ابن العم المباشر لبشار الأسد) . أما أخوه نمير فيعتبر واحد من أكبر زعماء المافيا والإجرام في سوريا. وبيكفي قلكون وذكركون بقصتين من أشهر عملياتو الإجرامية وهنن السطو المسلح على أموال فندق سميراميس صيف العام 2004 ، والسطو المسلح على أموال “شركة الهرم للحوالات” ، وقت اللي جمع هالمجرم أربعة مسلحين و اقتحموا الشركة في شباط 2005 وسرقو أكثر من أربعين مليون ليرة..

أما النائب الشبيح التاني ، علي مخلوف (35 سنة) ، فيعتبر من أبرز شركاءو لرامي مخلوف بعمليات النهب المنظم بالدولة ، وتنسب الو عمليات تهريب مخدرات للبحرين بسنة 2001 و 2002 ، لما أسس شركات واجهة لإخفاء عملياتو المافيوزية وراها. وبتتقدر ثروتو المنقولة وحدها ، رغم فصعنتو و صغر سنو ، مو أقل من نص مليار ليرة بالاضافة لثروتو غير المنقولة العقارات الثابتة اللي بتوصل قيمتها اليوم لنص مليار ليرة سوريه تانية..

يعذروني عوائل : الأزهري و المفتي و الشريتح و المحممودي و الهارون و الجود و الزين و البرادعي و الشومان و العجان و الفرحات و الحداد والعنتابلي و اليوزباشي و الحموي و الكلية و السعادة و المرقص والصوايا و الشدياق و الضوميط و القدسية و الكومين و الفهدة, و كل عوائل اللادقية اللي ذكرتها واللي الذاكرة ما أسعفتني أتذكرها ..

اعذروني كلشي قدمتوه لهالبلد من ميات السنين ما بيعطيكون الحق انكون تمثلوه, اللي بيمثلكون حثالات البلد الجدد من اسد و مخلوف و زباينهون النشح اللي متلهون..

الحكمة :

رح انرجّع اللادقية مدينتنا المستباحة..

بدهون يكونو برلمانيين، ينقلعو يمثلو القرداحة …زياد الصوفي – مفكر حر؟