قال الراوي ياسادة ياكرام

Bassam Yousef
 قال الراوي ياسادة ياكرام:
انه في حوالي الساعة العاشرة من صباح اليوم الأثنين المصادف في 16-10-2017 ، وبينما كانت طائرة استطلاع اسرائيلية “تتغندر” فوق لبنان وعم تاخد كم صورة “سيلفي ” مع الغيوم، فوجئت بصاروخ “زمط” من موقع عسكري سوري يقع على بعد 50 كم شرق دمشق وبلش يعاكسها من بعيد ، انزعجت الحلوة وتعكر مزاجها، ورجعت خبرت أهلها فقاموا بإرسال طائرتين مقاتلتين وقصفوا الموقع السوري كلو .
أهل الصبية ( طائرة الاستطلاع ) لساهن مستنفرين إنو شو عدا مابدا … هي الصبية بتطلع تعمل سيلفي فوق دمشق كل فترة وماحدا عاكسها، هلا بدكن تعملوا مراجل يعني …اسمعوا:
أي معاكسة تانية ما تلوموا إلا حالكن … هالمرة قصفنا البطارية اللي طلع منها الصاروخ، المرة الجاية الله أعلم شو رح نعمل، وعموما الحكي معكن متل قلتو، اليوم جايي لعنا وزير الدفاع الروسي – وليّ أمركن- “سيرجي شويجو” ..ومنتفاهم معو .
هذا ماصرح به اللفتنانت كولونيل “جوناثان كونريكوس ” المتحدث باسم الجيش الإسرائيلي، طبعا مافي داعي خبركن إنو ولا طائرة اسرائيلية انخدشت ..اللهم إلا شعور طائرة الاستطلاع.