Assil Zaben
اليوم بدنا ننتقد تصرفات الهندوس اللي مش مأثرين علينا بشلن. وبدنا نستذكر شراسة وعدوانية الاستعمار الإيطالي لليبيا لحد ما يتورم قلبنا بس بشرط ما حدا يحكيلنا “لا تتابعوا الدوري الإيطالي”! وبهمنا كمان نحكي عن خسة ودناءة الإستعمار الفرنسي اللي كل اللي شاركوا فيه صارت عظامهم مكاحل..بس برضه مش تيجوا تحكولنا “لا تشربوا نبيذ
Bordeaux”
! وبدنا نسب ونلعن أمريكا حتى نفش غلنا شوي قبل لا نذبح حالنا على فيزا تودينا عليها عشان نعيش زي الناس. و شو كمان؟ ااااه..بدنا نفضح….. الغرب المنحل أخلاقيا اللي بنتج أفلام إباحية ثبت حسب الإحصائيات إنه شعوبنا المحافظة الملتزمة سجلت أعلى نسب مشاهدة إلها على الإنترنت اللي هم برضه اخترعوه. بعدين بدنا ناخد استراحة عشان نحضر برنامج “خواطر” اللي بفرجينا مدى التحضر اللي وصلتله المجتمعات العلمانية عشان نتعلم كيف نحارب العلمانية عشان ما نصير زيهم. وبعد الإستراحة بدنا نقرأ الأخبار بالمنطقة عشان نشوف الذبح والاغتصاب والتفجير وانحطاط مستوى التعليم وحقوق الإنسان عشان نتأكد إنه ما في حدا ليبرالي حقير قاعد بنتقد واقعنا الوردي. هم ما وراهم شغلة ولا عملة غير ينتقدوا واقعنا؟!
ملاحظة: إذا لقيت حالك بعد قراءة هالحكي بتسأل “وانتي شو معرفك بنبيذ
Bordeaux
؟” إعرف إنه حالتك ميؤوس منها.
