في احد ممرات الجنة التقى عمر القابوني مع علي العكرماوي

على سيرة الحوار ، و في احد ممرات الجنة ، التقى عمر القابوني مع علي العكرماوي ، و دار بينهون النقاش السياسي التالي:
علي : هاون او تفجير؟؟
عمر : لا هاون و لا تفجير ، جماعتكون كانوا عم يقروا بكتاب الفلسفة – قسم قتل الأطفال..
علي: شو صار بعكرمة بعد ما متت انا و صحابي؟؟؟ سقط النظام اللي قتلنا؟؟
عمر : طلعوا اهلك مظاهرات عارمة لاسقاط المحافظ، قام بشار شال كل محافطين سوريا ما عدا محافظ حمص ، تركوا لغدرات الزمان..
علي : ما ضجروا العلويين من موتنا بهالطريقة ؟؟
عمر : ما لحقوا يضجروا و الله يا علي، النظام بعتلهون لما الأتاسي اتسليهون بفرنكين على صفحتها، و عمل مقابلة مع سلوم حداد باتشيل الهم من القلب..
علي : و السنّة شو عملوا لماّ متنا؟؟؟
عمر : عينك يا علي لو بتشوف السنّة شو عملو ، الله وكيلك صار في حالة من الانبحات العاطفي و الاخلاقي على صفحاتهون ، و ما كان ناقص الا يكتبوا بدكن حرييي..
علي: و المجتمع الدولي ما شعر بالقلق ؟؟
عمر : لا ما تاكول هم المجتمع الدولي، قلنالهون هدول أطفال سنة جبناهون من اللادقية على عكرمة و فجرنا فيهون سيارة..
علي : ما صار حداد وطني ؟؟
عمر : ايه لكن شو !!! تلات ايام الله وكيلك اتعلمنا من التلفزيون السوري تلات طبخات جديدة، و عرفنا اخيراً سر تكاثر أنثى الضفادع ..
علي : بس انت شو عم تعمل هون ، ما قلتلي؟؟
عمر : ما في أكرم من نظامك خي علي.. طلعوا اهلي من اربع سنين يغنّوا جنّة جنّة جنّة ، سوريا يا وطنا.. و من كرم النظام حققلهون رغبتهون.
علي : و لك عمورة ، اليوم عم اتطلّع عالشام من طاقة السما ، شفتها سودا كتير ، شو قاطعين الكهربا يعني ؟؟
عمر : لأ ولك غشيم ، شو كهربا ما كهربا، اهل الشام عم يحتفلو بالهالويين الهون كم يوم..
علي : ما اشتقت لأهلك ؟؟؟
عمر : هنن اللي اشتاقولي يا خي ، فإجيت لعندهون..