اللي بيشوف بشار الاسد اليوم داخل على قصر الشعب فوق السجادة الحمرا ، و عم يستعرض حرس الشرف من على اليمين و اليسار لحين وصولو الى القاعة الرئيسية لأداء القسم ، بيقول ايه شو هالقيصر الروسي اللي داخل ، او شو هالامير النمساوي اللي طالل علينا…
اللي قام بإخراج دخول هالمجرم هوّة نجدت انزور بطلب من لونا الشبل لإظهار الرئيس السوري على الطريقة البوتينية، ابتداءً من المشي وحيداً عالسجادة الحمرا ، لفتح الأبواب الموصدة امام جلالتو، الى دخولو الى قاعة الأراكوزات..
و في كل عمل أنزوري لا بد من وجود أعداد هائلة من الكومبارس المحيطين بالبطل الأسطوري ، لإعطاء العمل ضخامة فارغة من دون ذوق او عنوان..
خيول و دخان و مشاعل نارية و ذقون كثيفة و موسيقا تصويرية محيطة بهالفنتازيا التاريخية اللا زمانية و اللا مكانية..
ابطال الدراما السورية التافهة تحولو بلمسة أنزورية اليوم الى فريق من الكومبارس اللي ما الهون دور بهالفيلم الإباحي الطويل الا التصفيق و التبجيل و الهتاف..
ايمن زيدان اللي وقّع اليوم فعلاً على نهاية رجل شجاع و بداية مسخ نذل..
و دريد لحام اللي سمعنا عواءو من زويا المشهد التصويري عم يصرخ لأبوه ” و الله يا ابي مو ناقصنا الا شوية كرامة بس” ..
و رغدا اللي اتعدّت اليوم بفشخة رجلتين سوا كل الحدود ، و اكتفت بالجلوس في احضان ابو العيون السود..
و رشيد عساف اللي شلح عباءة معاوية بن ابي سفيان و انضم ككومباوس لقافلة الموتورين ممن يبحث عن قتلة الحسين..
و سلاف فواخرجي تعبت و أرهقت من ثوب اسمهان المبهبط عليها ، و اتوجّهت لكباريهات دمشق لتلعب دور البطولة في فيلم يحكي قصة حياة سارية السواس..
و عباس النوري اللي تنازل عن شهامة ابو عصام ليرجع لأخذ دورو الحقيقي و المتمثّل بالمأفون ابو بدر..
و مصطفى الخاني، حافظ على دور النمس بكل جدارة و مهارة و درجة عالية من القذارة..
و قصي الخولي اللي اتحوّل بسحر الانزور الساحر من جلالة خديوي معظّم الى مخصي في حرملك بشار الوحش..
و الياخور البطل.. اللي نجّس اسم سيدي خالد ابن الوليد في احد بطولاتو ، فتنازل اليوم عن لقب سيف الله المسلول و اكتفى بلقب جراب الاسد المبخوش..
و وائل رمضان الكومبارس اصلاً، فحافظ على دور الكومبارس اللي عم يلعبو في دور زوج الست سلاف..
اما بسام كوسا ..
يا عيني على شهامة و مروءة بسام كوسا، و على محبة بسام كوسا لبطل هالفانتازيا..
بسام اللي تنازل اليوم عن دور الإدعشري ليعطيه لبطل هالملحمة التاريخية بشار الوحش ، بعد ما أقنعوا للادعشري الجديد انو ما يخاف اذا حلف كذب على كتاب الله ، فاللي برقبتو دم مليون بني آدم ، ما رح يأثّر فيه كم سنة زيادة بنار جهنم اذا حلف يمين كذب على كتاب الله ..
فيلم بشار الوحش..
رؤية و سيناريو و اخراج انزور الجحش..
