فكرة اكتشاف الشريك لما بعد اكتشاف الوطن

دعوات دولية على لسان الروس ، و ابتزاز اممي بتوقيف المساعدات الغذائية ، و البحث عن من يريد الدخول بهاللعبة السخيفة لتقطيع تلات شهور اخرين من العمر الدموي للسوريين ، بانتظار مفترق طريق اخر و الدخول بلعبة سياسية تانية لتمرير الوقت ..
مع مين بدكون يانا نتحاور ؟؟؟؟ مو الاجدى تعرفوا مين شركاءنا بالوطن اللي لازم نتحاور معهون و نطلع بوطن نظيف معهون!!!
عم حاول ابحث في دولة الاسد عن من لم تتلطخ ايديه بالدم او العقل السوري ، بركي منشوف كم حدا يكون شريك معنا بهالوطن و نجلس معو على طاولة حوار حتى و لو كانت روسيّة حيث الشمس ستشرق من هناك..
اثناء بحثي شفت هالعينات يا سادة ..
– شفت الضابط اللي كان عايش على الليرة اللي بيبتز فيها العسكري ، الليرة اللي حرموا حالهون الأهل منها منشان يصرفها ابنهون اثناء الخدمة العسكرية..
-شفت رجل الأمن اللي عاش على ابتزاز المواطن و سحبو على الأفرع الأمنية بتقرير مزيف منشان ياخود اللي بقيان مع اهلو من مال لإخراج ابنهون من موت محتّم..
– شفت البعثي اللي خرب عقل المواطن بشعارات كاذبة و لعب بمشاعروا و ببساطتو منشان استمرار مكاسبو الشخصية..
– شفت أساتذة الجامعات و المدارس اللي كان الهون كل الأثر السلبي بتشويه عقول الناس و دفعهون عن المسار الصح..
– شفت الأسدي اللي عاش كل عمروا و هوّة يمص دم السوري و يرميه ناشف بعد ما يخلص منّو..
– شفت الموظف المرتشي اللي مستعد يخرب وطن مقابل رشوة من مواطن بدّو مصلحة فاسدة تمشي..
– شفت علماء الدين اللي شوهوا إيمان المواطن السوري و خلوه اما متطرف او ملحد..
ما الي كم يوم بديان بالبحث عن شركاءنا، و هاد اللي طلع معي، فقررت وقف العمل على اكتشاف شريكي بالوطن و شفت انو الأفضل ونتيجة مشاهداتي الأولية انو ابحث عن وطن بالبداية داخل حدود سوريا، و تأجيل فكرة اكتشاف الشريك لما بعد اكتشاف الوطن..