فعندنا بلد لازمها تحرير

يا رب ترجع البسمة لأطفال سوريا

يا رب ترجع البسمة لأطفال سوريا

خلص العرس ، و انضب هالغنم بالاسطبلات ، و العريس رجع لحضن مرتو باكتر من تمانين بالميّة من أصوات المستوطنين من حملة الجنسية السورية..

ما بدّي شكّك بالأرقام الانتخابية ، فبكون هيك بشكل او بآخر عم أعطي شرعية لانتخابات هيّة من الأساس فاقدة لكل صنوف الشرعية..

اللي بدي احكي فيه هوّة حملة الهيجان اللا أخلاقي اللي اترافق مع اعلان انتصار الاسد على بقايا أشلاء الشعب السوري..

و الأسئلة اللي رح اسألها للمتهيجين لا اخلاقياً و ماني بالمناسبة ناطر الجواب على اي سؤال ، لانو كل الأجوبة عندي :

– هل انتصر الاسد فعلاً، و على مين انتصر ؟؟
– هل رح تقدر ايها المتهيّج بكرة تنزل تتبضّع بأسواق حلب، و تكزدر صوب عاصي حماة، و تتمشور بشوارع حمص ؟؟؟
– هل رح تقدر بكرة تروح على غوطة الشام تعمل سيران مشاوي مع أصحابك ؟؟
– هل أعاد انتصار الاسد اليوم أرواح مية الف علوي من اهلك ماتو فدا بوطو؟؟
– هل نزل سعر الليرة مقابل الدولار؟؟
– هل رجّع انتصار الاسد الكهربا من دون تقنين؟؟
– هل انتصار الاسد أعاد أسعار السلع الاستهلاكية الى حدودها قبل الثورة ؟؟
– هل قدر انتصار الاسد يوقف زخ الصواريخ فوق روسكون، و يمنع انتصارو العمليات الاستشهادية و السيارات المفخخة؟؟
– هل صار بإمكان أختك تطلع الساعة تلاتة بالليل؟؟
– هل اعلان فوز الاسد أوقف الموت في صفوفكون ثانية وحدة من بداية اعلان موعد العرس للحظة فك بكارة سوريا بطريقة غير شرعية؟؟

أو اللي صار مايلي :

– ألم يستفّز اعلان انتصار الاسد كل من كان واقف على مسافة وحدة من النظام و المعارضة؟؟
– ألم يزيد انتصار الاسد عزلة سوريا الاسد دولياً؟؟
– الا تعتقد ايها المتهيّج انو العمليات العسكرية ضد جيش العهر رح تتضاعف نتيجة هالانتصار؟؟
– ألا تظن انو بانتصار الاسد اغتيال لأي حل سياسي و اضعاف لموقف روسيا الدبلوماسي قدّام المجتمع الدولي؟؟
– الا تعتقدي ايتها المتهيّجة انو انتصار الاسد يعني تسليح أشد للمعارضة ؟؟

فأيها المتهيّج .. ايتها المتهيّجة..

اذا كان هاد تعريف الانتصار في قواميس النصر عندكون ، فمبروك عليكون الفرح بهالنصر، و كلشي مطلوب منكون انّو تعودوا على بيوتكون هلأ يا حلوين يا شاطرين ، حاجة اتسلّيتو و لعبتو ما فيه الكفاية اليوم، و اتركونا نشتغل ، فعندنا بلد لازمها تحرير..