عجيب من وين اجا كل هالتطرّف الى سوريا

اربعين سنة و هنن عم ينتشروا متل الجراد في كل الاراضي ، عم ياكلوا الأخضر قبل اليابس، و ينتقلوا من وادي الى وادي ذي زرع ليطلعوا منّو صحراء جافة كرؤوسهون..
اربعين سنة حرقوا الارض فهرب المزارع.. ريّفوا المدن فهاجر الموظف ، احتلوا الشاشات فاختفى الفنان، انتشروا في السماء فاختفت الطيور المهاجرة ، رموا الديناميت في البحار فقتلو بيض السمك قبل السمك..
اربعين سنة صابرين على حقدهون منشان الوحدة الوطنية ما تنكسر، صابّين ملح عالجرح منشان ما تتفتّت حجار الفسيفساء المتكسّرة اصلاً ، راضين بالفقر من مبدأ ” الحيط و يا ربي السترة”..
اربعين سنة بإيدنا مبيدات الجراد وما استخدمناها، وضعناها عالرف و قلنا بأصواتنا فقط حاجة بيكفّي.
ما استوعب الجراد كيف انو صاحب الحقل طلع صوتو و احتج..
جمعوا حشودهون باشكالهون المقيتة و المغطاة بدروع حديدية بتحمي أجساد غضروفية هشّة ينفح منها ريحة كريهة، و بوجوه قبيحة مكسوّة بخوذات يرشح من داخلها مواد اسيدية لزقة ..
فقتلو السوري في عهد الجراد الابن بعد ما قتلوا سوريا في عهد الجراد الاب .
استخدمنا الدبلوماسية في الحل ، فهموا الدبلوماسية بأنها ضعف..
حاولنا التفاوض للوصول الى نهاية ، جلسوا للخداع لا للتفاوض ..
قبلنا الحلول الوسط، فرفضوا الا الحلول الجذرية الدموية..
كل هالشي حدث و ما زال يحدث امام مرأى و مسمع الجميع من دون تحريك اي ساكن ، و بيبقى السؤال الأول و الأخير في كل مرة بتجتمع فيهون :
عجيب ، من وين اجا كل هالتطرّف الى سوريا !!!
حقاً عجيب..