عبعوب مريض ..سودة عليّ

ولكم ياعمي ..صايره دايره.
طلعنا هالمرة مدير عام العلاقات والاعلام في امانة العاصمة اسمه حكيم عبد الزهرة.
هذا الحكيم ليس له من الحكمة في شيء سوى”اللواكه”…ويسوي الحبه كبه.
هل يمكن ان يعقل وجود انسان يرأس مثل هذا المنصب وعايش على كرتنا المسطحة؟.
اقرأوا ماذا قال قبل ساعات:ان الوعكة الصحية التي تعرض لها امين عام العاصمة نعيم عبعوب هي بسبب تعرضه للاجهاد الشديد،لأنه وخلال الثلاثة أشهر الماضية عمل بشكل كبير خلال الليل والنهار وعلى مدى أكثر من 12ساعة يوميا وقد تصل إلى 14 و 15 ساعة وهذا موضوع فوق الطاقة وسبب له إجهاداً كبيراً وأن” نصيحة الأطباء لعبعوب كانت بأن يعالج خارج البلاد للابتعاد عن أجواء العمل لكنه تم طمئنتنا من العاصمة اللبنانية بيروت امس وقال بأنه أجرى كافة الفحوصات المطلوبة ووضعه الصحي مستقر، و”من المؤمل أن يعود إلى بغداد نهاية هذا الأسبوع.
بويه يامدير عام الامانة،هاي جتافي للعباس اذا انت تكول الصدك.
كلنا نتمرض وكلنا نتعرض للاجهاد فهل هذا يستحق ان نشغل به وسائل الاعلام؟.
ولكم ياعمي خافوا الله.
تكول وعكة صحية..على راسي..ليش اطباء بغداد ماعرفوا السبب؟ شنو وعكة عبعوب غير شكل؟.
فعلا اطباء بغداد صاروا خردة حتى الوعكة الصحية غريبة عليهم.
واحنا “الزعاطيط” نعرف ان الذي يصاب بوعكة صحية مايكدر يطير بالطيارة الا اللهم يكون معه مرافقين صدر امر ايفادهم قبل كم يوم.
بعدين ياجماعة الخير اللي يشتغل 14 ساعة يوميا راح تظهر نتائجه على الناس،خصوصا اللي يمرون على تمثال الرصافي…مو؟.
بعدين ياحكيم اللي كتب لك الخبر مايعرف حتى كيف يقرأ القراءة الخلدونية لأن سوى الوعكة لطمية وحزن ولازم ناس بغداد تركض من طويريج الى مبنى الامانة حتى تردح له طلبا بالشفاء العاجل.
خويه حكيم ..مو غريبة منك باجر عبعوب يزور اخوه المريض وتكتب عنوان الخبر بهذا الشكل:عبعوب يزور اخيه المريض بسبب وعكة صحية.
او…
عبعوب يحضر حفل زواج لأحد العاملين في الامانة رغم وضعه الصحي غير المستقر.
او…
عبعوب يناشد اهل الخير بالتبرع بالدم لعدد من العاملين في الامانة المصابين اثناء رفع الصخرة اياها.
سمعت فد يوم ان اوباما زار طبيب الاسنان لعلاج لثته المحترمة او بوتين راح يزور خاله الراقد في المستشفى او حسنة ملص ودت كبة حامض لزوجها في نقطة السيطرة.
عمي عيب ..والله عيب.
خزيتونا الله يخزي عدوكم.
الفاصل اليوم بح

محمد الرديني (مفكر حر)؟