Anwar Homs Alomar
من فترة منيحة تعطلت سيارتي و كان بدها حوالي أسبوع لتتصلح و ما كان في مجال غير أنه أستأجر سيارة لبين ما تتصلح، رحت على محل لتأجير السيارات يلي جنب بيتي .. أستقلبني الموظف الباكستاني بإبتسامة عريضة أضفت على وجهو غلاظة من أول وهلة .. و لساني عم أسأل عن العروض يلي عندهن و التخفيضات إذا كان الآجار لفترة أكتر من يومين، و من جملة الحديث سألني عن أسمي و لما قلتله أنوار سألني السؤال السحري ” آر يو مسلم ؟ ” أومأت برأسي بامتعاض لأن هل سؤال غر مستحب أبداً هون .. قفز بالهوى قفزة فرح و اشرأبو أدانه و وقفو شعرات حواجبه و قلي يعني يو آر ماي سيستر بالدين .. كمان أومأت برأسي و أنا أتوجس شراً .. قلي رح أعطيكي تخفيض خاص على مسؤليتي ما بعطيه لحدا و هو 10% .. شكرته جداً و قلت لحالي لا بقى تتسرعي يا بنت و تاخدي فكرة غلط لمجرد انك ما أرتحتي للزلمة .. و بعد نوبة تأنيب الضمير و أنا على وشك الدفع بتفوت فجأة مديرته الكندية الكافرة و بتسلم عليي بوجه بشوش و بتشكرني أنه أنا عندهن و بثق باسمهن و بتسأله لأخي يلي ما ولدته أمي الباكستني
كم يوم بدها .. قلها أسبوع و هو عم يتأتئ و يعرق .. قالتلي فيري غود .. معناها انتي بحقلك العرض يلي عنا لهاد الأسبوع و هو أنه آخر يوم على حسابنا .. غير التخفيض العادي 10% يلي هو لأي آجار أكتر من 4 أيام .. عملت المناسب معها يا حفيظ ؟
هون بقى أنا اطلعت شزراً على حفيظ و عيوني عم تقدح شرراً و قلتله .. لا يكون إجرة الأخوة أنه تقرط يوم على أختك يا حفيظ ؟
دفعت و تركته يوضح لمديرته الكافرة شو معنى كلامي
صخام يلط حفيظ و كلشي بيشبه حفيظ