صار في شي اسمو اسلام معتدل شو ما سمعت ؟

رسالة اعتذار الى أسلافنا..
باعتذر منكون بالنيابة عن نفسي بعد ما صرنا أُمَّة كل مين ايدو الو ، و كل واحد صار عم يقبّع شوكو بإصبعتوا.
باعتذر منكون .. ما قدرت رد على سفهاء الارض بلغتهم لما هاجموكون، فأنا ابن مدرسة علمتني انو الشديد ليس بالصرّعة ، إنما الشديد الذي يملك نفسه عند الغضب..
باعتذر منكون.. فما عاد في قدرة على تحمّل انفعالاتنا، و فقدنا القدرة على اعادة شحن صبرنا اللي مل منّا..
دخيلك يا جدّي لا عاد تسألني عن سابع جار و لا عن سادس و لا حتى عن خامس، فجارنا اللي حيطو على حيطنا ، ما اتحمّل نزوح ولادك و أحفادك الخايفين ، و صار يبيع و يشتري فينا و يتاجر بأعداد الخيم المنصوبة على اراضيهون ، و صار يسمسر حصصهون الغذائية بالسوبرماركات..
لا تسألني يا جدّي عن الوفا ، فالغدر صار مننا و فينا، و الوفا صار بينباع و بينشرى بالدولار ، و الخوف يا سيدي صار شريكنا على مخداتنا، و القهر نديم سهراتنا ، و الهوان نسيم صباحنا..
لا تجبلي سيرة الصدق.. فالكذب صار ملح كلامنا ، و قول كلمة الحق تمنها سنين بالسجون ، و النفاق صار من صفاتنا الحميدة اللي بتزكّينا عند حكامنا..
و بمناسبة الحديث عن حكامنا ، رح احكيلك عنهون.. صار الحاكم اله ، و بحب خبرك يا سيدي انو عملنالهون اصنام و متاحف ، و صرنا نروح على مقابرهون لمسح ذنوبنا و كسب ثواب زيارتهون..
اما عن كرامة الامّة، فحدّث و لا حرج..صار البوط العسكري فوق راسنا، و الطفل صار بيخلق بالسجون و الخيم ، و النسوان عم تشق انفاسها لتغطّي تغييب ازواجها، و الشباب طوابير على ابواب السفارات و على لوائح مهربين شخاطير الموت..
العرب يا جدّي صارو ١٥ دولة و الخير لقدّام ، و الشام و اليمن صارو عواصم اللطم و الندب، و الحجاز صار عقار مرهون للبنك الدولي، و ارض الكنانة بحب بشرك ، من سنة انتخبت فيفي عبدو ام مثالية لام الدنيا ، و المغرب العربي صار تلاتة و نسي كيف يحكي عربي، و ذاكرتنا عن الأندلس ما عادت تتعدّى تاريخ اخر مباراة كلاسيكو..
امّا حياتنا كيف صارت..هيدي حكاية لحالها.. الحرامي صار من عليّة القوم، و الشريف صار بينوصف بالدروشة ، و كلب الامير أمير، و المزابل قامت ، و العلماء اتهجّرت، و صرنا منحفظ أقوال حكامنا بصم بدل حفظ أحاديث رسولنا، و العاقل صار بنص عقل ، و الفقير زاد فقرو، و الغني ما عاد يشبع..
بحكيلك يا جدي عن ديننا وين صار؟؟؟
سمعت بنهفة الارهاب!!! ما بدّك هالسمعة.. بس خليني احكيلك لحتّى ما تسمعها من الغريب : صار اللي بيصلّي بالجامع مثير للقلق، و اللي بيصوم رمضان مشكوك بحسّو المدني ، و اللي بيزكّي عن مالو صار الإنتربول بيلاحق حساباتو ليشوف وين هالمصاري رايحة..يعني يا جدي صرنا فرجة الله وكيلك ، و صرنا مننكر ديننا بمطارات الغرب قبل صياح الديك تلات مرات باليوم، و صرنا منشتم رسولنا ليرضى علينا ابو عيون زرق و اسنان فرء و يحسبنا من المعتدلين..
ولك ايه ايه ، صار في شي اسمو اسلام معتدل شو ما سمعت ؟؟؟ يعني مسلمين بزيت و مسلمين بسمنة ، و الشاطر عم يضحك علينا و يغيّر تصنيفنا على قياسو..
رح احكيلك شوي عن ربيعنا العربي اذا بعدك رايقلي..
طلعنا من كم سنة يا جدي عالشوارع قلنا حرية ما عجبهون.. قلنا اسلام و مسيحية ما اجت على زوءهون.. قلنا واحد واحد واحد قاموا حطّو كل واحد فينا بمخيم.. قلنا مالنا غيرك يا الله ، اعتقدنا بشار انو قاصدينو و رشّح حالو و نجح..
و عينك لا تشوف النور يا معلم لما قلنا الله اكبر ، صار الطظ بدّو يحمي مقدساتو، و الفش بدّو يدافع عن قبور اجدادو، و حسيسون ابو مخطة طابت معو يعرف مين قتل الحسين ، و شلاويط ابو خرية تعهّد انو زينب لن تسبى مرتين..
الله رحمك يا جدي و رحم كل جيلك، لو ضليتو عايشين لهلأ، كنت اخدت سيلفي معك و نزّلت الصورة على صفحتي عالفيس بوك ، و كان اجاك تعليق من ابن سينا عم ينصحك بعملية تجميل لأنفك ، و كان ساهم الخوارزمي بحساب عدد اللايكات اللي اجتك ، و كان الإدريسي رسملك خارطة طريق لبناء عضلات جسمك، و كان الفارابي عمل تاغ لدريد الاسد زميلو بمدرسة الفلسفة ، و كان الكندي عم يحاول يهكّر الصفحة ، و ابن رشد و الأبهري و ابن النفيس عم يحسدوك على هالطلّة و هالشبوبية..
اما ابن بطوطة فكان عم يلم الراغبين بالهجرة و يطالعهون معو تهريب بشخاطير الموت..
الله يرحمكون ..
وين كنّا و وين صرنا..