صاحبنا ابو حسين اوباما هو حماتنا المحترمة

امريكا حماتنا
ام حسين ست قوية مو سهلة ابدا كلمتها ما بتصير كلمتين على الكل الزوج والاولاد والاحفاد حتى ان سلطتها تمتد على سائر سكان الحي
كل زوجات اولادها مطيعين ما بيخالفوها ماعدا زوجة ابنها الصغير بشرى خانم صحيح هي قداما بتكون متل القملة المفروكه بس بمجرد تغيب بتصير بشرى فرعون زمانها
بشرى منغصة عيشة زوجها المسكين والاولاد كل يوم نقار و خناق وشرطه رايحة و شرطه جايه و محاضر اعتداء ويوم بتتوقف هي بالمخفر و يوم جوزها بيتوقف لأن اهل بشرى لهم معارف وجماعة واصلين وايدهم بحلق المسؤولين من كبيرهم لصغيرهم لذلك قلب الحقائق سهل ومع ذلك اذا ظهرت ام حسين على الساحة الكل بيسكت
ام حسين عارفه انه ابنها مظلوم بس على الرغم من انه سبق تدخلت بحياة اخوته الاكبر و فرضت على البعض ان يطلق زوجته لاسباب ابسط من المشاكل يلي عما تعملها بشرى الا انه الغريب هون ام حسين تدخله محدود واذا حد سألها ليش ما بتوقفي لجنب ابنك و تطلقي بشرى منه بتقول : لا خليهم عما يربوا بعض في اولاد بيناتهم
طيب يا ام حسين انت طلقتي العراقية مرة جوزك الاكبر وعندها عر اولاد و التونسية مرة محمد يلي شغال بلبيبا وكمان عنده عر اولاد ليش متمسكة ببشرى ونحن بنعرف انك بتكرهيها للعمى
بترد عليك ام حسين بكل برود وبتقول : ابني وبعرفه مالي ثقة فيه اذا طلق و تجوز ما تجي وحدة العن من بشرى وتركبه وتمشيه على كيفها او يتكرر الاشكال والخناق بيناتهم بس على صورة ابشع من هلق
صاحبنا ابو حسين اوباما هو حماتنا المحترمة قوية وقادرة وساكته مطنشة على عمايل بشار فينا و مش راضي يفرض الطلاق و تارك بشار يـ ….. لغاية في نفس ابو حسين