شوية قشر بعد ما عصرك بشار الاسد

١٣ أكتوبر ١٩٩٠..
” انا اخر واحد بطلع من هون، بفضّل انو موت معكون ” ..
هيدي كانت الكلمات الاخيرة للجنرال البرتقالي ميشيل عون ، و الموجهة الى جنود الجيش اللبناني- فرع عون ، قبل لحظة الهروب المشينة حافي الى مقر السفارة الفرنسية في طريقو الى المنفى الباريسي..
١٥ سنة عاشها الجنرال العصبي المزاج و هوّة يعوي من باريس بتلات ملفات :
– خروج الاحتلال السوري من بيروت.
– المفقودين اللبنانين في السجون السورية.
– محاسبة سوريا الاسد..
مشكور نضالك يا فخامة الجنرال ، بس حابب أسالك تلات أسئلة في هذا الخصوص :
– هل حقاً خرج جيش الاحتلال الاسدي من بيروت ، او أعاد الانتشار و فرض سلطة حزب الله حليفك اليوم ؟
– هل عاد التلات آلاف مفقود لبناني من اللي هربت و تركتهون وراك يوم هروبك الأخير ، ام ما زالو احياء او اموات في اقبية سجون الاسد ؟
– هل قرار محاسبة سوريا الاسد و اللي انت ساهمت بشهادتك الحيّة على استصدارو جاري التنفيذ ، او انت عم تشارك النظام اليوم في محاسبة السوريين ؟؟
كنّا تناسينا مشهدك المخزي يوم اللي تركت جنودك وراك ، و لكن ما رح نقدر ننسى ابداً عار وقوفك مع الجزّار..
ظننا يوماً انك برتقالة لبنانية، و لكن مع الأسف ما بقي منك بعد ٢٤ سنة من هالذكرى الا شوية قشر بعد ما عصرك بشار الاسد و شرب عصيرك نصرالله ، و الاخطر انو رمى بذورك القذرة في تراب بيروت لتكبر و تطلع شجرة من دون ثمار و لا فيء..