سوريا مو البلد الّي الابن فيها بيقتل امه كرمال دين

الى المنجمين و المتنبئين و خلفاء الله و الانبياء عالارض :
بعد التحية لتحليلاتكن و نبوءاتكن و نظرتكن المستقبلية الفظيعة .. ((( حااااج تتخيلوا ))) ..
لو اني من النوع الّي بيبيع بلده و مبادئه ما كنت بفوت بالاوجاع و الفقراء و المرضى و المخطوفين و المعتقلين .
لو بدي اعمل متل كتار ما كنت بختار كون صوت الضعفاء ، كنت بوقف بصف الدولة او الائتلاف و بكسب كتير .
القصص الي عم اعطيها لصناع الفيلم هي حقيقة الّي صار و الّي عم يصير بحق شعب مسكين ، بحق بلد عمرها 7000 سنة ،
( و لو ما بتعرفوا شو مفظعين بالبلد ما كنتو بتخافوا من الحقيقة )
لو بتعرفوا شو بيعنيلي انه نوصل صورة سوريا الحقيقية للعالم ..
انه نقول سوريا مو داعش .. سوريا مو البلد الّي الابن فيها بيقتل امه كرمال دين .. سوريا مو جمال و رعي خواريف .. سوريا مو بلد ارهاب .. سوريا مو بلد تفجيرات و كيماوي و براميل و صواريخ ..
سوريا اكبر من علم بنجمتين و علم ب 3 نجوم ..
سوريا مانها معارض و موالي و شعب عم ياكل بعضه ..
سوريا اليوم صرخة أم جابولها علم فاضي و قالولها مبروك يا ام الشهيد .. سوريا كسرة ضهر اب قدام عيون اطفاله الجوعانين .. سوريا لهاث ام عرجلين طفلها لتدفيه من البرد .. سوريا حسرة عيون ناطرة اولادها المفقودين .. سوريا الي هجموا عليها من جوا و برا متل الوحوش و لليوم ما انكسرت .
نحن آراميين و فينيقيين و سريان و آشوريين و عرب .. نحن الّي علمنا العالم الحضارة و من عنا بيستمد الكون طهارته .
ما بيهمني رجّح كفة دولة او معارضة متل ما معظمكن بيعمل .. بيهمني اسم سوريا ، فهمتوا يا اولاد البلد ؟
بشك .. لانه الّي بده يفهم فهم من اول لحظة للحرب و رحم هالبلد من لسانه و الّي مابده يفهم اذا بيصفى بلا وطن و بلا هوية مارح يفهم .
و تحياتي للاكابر الّي بيعرفوا شو انا بدون ما اضطر اشرح .