سوريا غرقت من ورا الكذب و الخداع

صاير بالسوريين اليوم متل اللي قاعد عم يسمع حكيات هالحشاش زياد ابن فيروز..
منضحك و مننفعل على حكياتو ، بس ما عرفانين ليش عم نضحك و على شو عم ننفعل..
و هيدا الشي مو حق حصري بس بالشعب السوري، هيدا حال كل مين عم يراقب او متدخّل بتفاصيل الثورة..
بتسأل السياسي بيقلّك ما بعرف، بتسأل الإعلامي بيقلّك و الله ضعنا، بتسأل المقاتل بيقلّك ما عارف شو عم يصير، ولك حتى بتسأل المؤيد نفسو بيقلّك و حياة بشار ما حدا دريان لوين رايحة الأمور..
حالة من التخبّط ممزوجة مع التوقّع بس ما حدا بيقلّك شو اللي ناطرها لهالبلد..
فريق سياسي متمثّل بالائتلاف غايب تماماً عن الوعي.. قيادات متعاقبة مرّت على راس هالجسم المترهّل، من غليون مروراً بالسيدا عبوراً بالخطيب و من بعدو الجربا ، و وصولاً لهادي البحرة و الجديد اللي ما حفظت اسمو لهلأ..
ما رح حمّلهون مسؤولية اللي صار لهلأ ، بس بحمّلهون مسؤولية الخداع اللي مارسوه على الشعب السوري..
انو تقول ما بعرف، ما غلط..
انو تقول الحل مو بأيدي ، مانو عيب..
انو تقول ما عرفان شو صاير، ما بينقّص من قيمتك..
العيب و الغلط انو تقول بعرف و انت جاهل..
العيب و الغلط انو تقول الحل قريب و انت ما عرفان الله وين شالحك..
العيب و الخطأ و الخطيئة انك تكذب على ناس وثقوا فيك بارادتهون او مجبرين..
نداء من مواطن سوري بسيط الى رئيس الائتلاف الجديد :
المسؤولية كبيرة بعرف، و الإمكانيات قليلة كمان بعرف، بس المطلوب منك شي واحد بس ..
الصدق مع الناس..
أخرج بمؤتمر صحفي، و خبرنا اللي بتعرفو فقط من دون الغوص بالتوقعات و التأملات و ما تم وعدك فيه..
خبّرنا شو في بايدك ، لا تخبرنا بتأملاتك..
قول ما عندي شي قدموا و بحاجة لمساعدتكون، لا تقول متل اللي قبلك انو بأيدك كلشي و نحنا اللي بحاجة لمساعدتك..
سوريا غرقت من ورا الكذب و الخداع و الوعود الفارغة لكل مين سبقك..
ما مطلوب منك خشبة الخلاص ، و لا مطلوب منك عصاية الساحر، و لا حقيبة سبورت بيلي..
كلشي مطلوب منك الشفافية و الصدق..
فهل انت قادر عليهون؟؟
اذا قادر فأهلاً فيك، و اذا مانك أد الصدق، فطابور اللي فشلو قبلك طويل، و بيتحمّل يطول اكتر..
بس حدا يذكرني بإسمو و الله ضعت..