راس الملكة زنوبيا استبدلوها براس جحش

لمّا كنت صغير كانت ورقة الخمسمية ليرة شي ما شوفو الا كل اول شهر لمّا الوالد يقبض راتبو المؤلف من كم ورقة خمسمية ما بيتجاوز عددها عدد أصابع ايدين نجّار طايرة سبابتو بضربة منشار..
تسع ورقات خمسمية ممزوجة بريحة ايدين بياع البصل بسوق الهال، و معطّرة بريحة ايدين بياعين المازوت، و ملزّقة باللزّقة من زاوية، و مكتوب على زاوية تانية منها بخط بياع الحليب رقم بالحبر الأزرق السايخ على سطحها من تلامس الورقة بعرق ايدين بيّاعين الجبنة الخضرا على رصيف سوق الهال..

تسع ورقات تدخل اول كل شهر على بيت مؤلف من سبع أشخاص..
اب و ام و جدّة و اربع اولاد..
كان نصيب الواحد منها ست ورقات زرقاء من فئة المية ليرة في الشهر الواحد..

كبرت العيلة أفقيا و شاقوليا ، زاد عددها و كبرت أعمار أفرادها ، و هالتسع ورقات بدل ما يكبروا مع هالعيلة، كانو عم يصغروا قيمةً و حجماً و تاثيراً..

اتغيّرت أشكالنا و كبرنا، و اتغيّر معنا شكل الخمسمية وصغرت..

اليوم في خمسمية جديدة بالسوق..
خمسمية من دون ريحة مازوت ابو صالح ، و لا ريحة عفن جبنة ام اسماعيل..
خمسمية خالية من اي اثر للكباب القطري، او الحشيش السعودي..

الخمسمية على ايامك يا ابي فتحت بيت، الخمسمية على ايام أحفادك ما بتشتري شوية ورق ريحان لحطّو على قبرك و اقرالك الفاتحة و قلّك:
الحمدالله يا ابو زياد انك متت و لا شفت خمسميتك براس الملكة زنوبيا كيف استبدلوها براس جحش قالو عنّو أسد..