– ﻛﺮﺍﻣﺘﻚ ؟
ﻃﻠﻊ ﺍﻟﺪﻛﺘﻮﺭ ﺑﺎﻟﻤﺮﻳﺾ ﺑﺎﺳﺘﻐﺮﺍﺏ
– ﺍﻳﻪ ﻛﺮﺍﻣﺘﻲ .. ﻣﻮ ﺍﻧﺖ ﺩﻛﺘﻮﺭ ﺟﺮﺍﺡ ﻭ ﺍﺷﻄﺮ ﻭﺍﺣﺪ ﺑﺎﻟﺒﻠﺪ ﺑﻤﻌﺎﻟﺠﺔ ﺍﻷﻭﺭﺍﻡ ﺍﻟﺨﺒﻴﺜﺔ ؟
– ﺍﻳﻪ ﺑﺲ
– ﺩﻛﺘﻮﺭ .. ﺻﺪﻗﻨﻲ ﻣﺎ ﻓﻲ ﺍﻭﺳﺦ ﻭ ﺍﺧﺒﺚ ﻣﻦ ﺍﻟﻜﺮﺍﻣﺔ .. ﻭ ﺍﻧﺎ ﻛﺮﺍﻣﺘﻲ ﻛﺘﻴﺮ ﻋﺎﻟﻴﺔ
– ﻃﻴﺐ ﺣﻜﻴﻠﻲ ﺷﻮ ﻋﻤﺘﺤﺲ ..
– ﻣﺸﻜﻠﺘﻲ ﺍﻧﻲ ﻋﻤﺤﺲ .. ﻣﺎ ﻋﺎﺩ ﺑﺪﻱ ﺣﺲ .
ﺍﻟﻜﺮﺍﻣﺔ ﻣﺆﻟﻤﺔ ﺩﻛﺘﻮﺭ
ﺍﻧﺎ ﻣﻬﻨﺪﺱ ﻭ ﺍﻧﺨﺮﺑﺖ ﻋﻴﺸﺘﻲ ﺑﺎﻟﺤﺮﺏ ،
ﻭﻛﺮﺍﻣﺘﻲ ﻣﺎ ﻋﻤﺘﺨﻠﻴﻨﻲ ﻣﺪ ﺍﻳﺪﻱ ﻟﺤﺪﺍ ﻣﺸﺎﻥ ﻃﻌﻤﻲ ﻋﻴﻠﺘﻲ
ﻛﺮﺍﻣﺘﻲ ﻣﺎ ﻋﻤﺘﺨﻠﻴﻨﻲ ﺍﺷﺘﻐﻞ ﺣﻤّﺎﻝ ﺑﻴﺘﻲ ﺭﺍﺡ ،ﻭ ﺻﻔﻴﺖ ﺑﺎﻟﺸﺎﺭﻉ
ﻛﺮﺍﻣﺘﻲ ﻣﺎ ﻋﻤﺘﺴﻤﺤﻠﻲ ﺍﻗﺒﻞ ﻣﺴﺎﻋﺪﺍﺕ ﻭﻗﻔﺖ ﺳﺎﻋﺔ ﻋﺎﻟﺪﻭﺭ ﻟﻌﺒﻲ ﺗﻨﻜﺔ ﻣﻲ ﻣﺒﺎﺭﺡ ،
ﺍﺟﺎ ﻭﺍﺣﺪ ﺷﻐﻠﺔ ﻛﺒﻴﺮﺓ ﻭﻗﻒ ﻗﺪﺍﻣﻲ ﺑﻼ ﺩﻭﺭ ﻭ ﻋﺒﺎ ﻋﺸﺮ ﺑﻴﺪﻭﻧﺎﺕ
ﻛﺮﺍﻣﺘﻲ ﺻﺎﺭﺕ ﺗﻨﺨﺰﻧﻲ ﺻﺮﺧﺖ ﻭ ﻋﻴﻄﺖ ﺍﻛﻠﺘﺎ ﺳﺐ ﻭ ﻛﻒ ﻭ ﻛﺮﺍﻣﺘﻲ ﺻﺎﺭﺕ ﺑﺎﻻﺭﺍﺿﻲ ﻭ ﻟﻬﻠﻖ ﻋﻤﺒﺮﺟﻒ ﻣﻦ ﺍﻟﻘﺼﺔ
– ﺍﻟﻌﻤﻰ ﻛﺮﺍﻣﺘﻚ ﻛﺘﻴﺮ ﻣﺘﻀﺨﻤﺔ ﻳﺎ ﺍﺑﻨﻲ ، ﺑﺠﻮﺯ ﺗﻜﻮﻥ ﻣﻠﺘﻬﺒﺔ ، ﺑﺲ ﻫﺎﻱ ﻇﺮﻭﻑ ﺍﻟﺒﻠﺪ .. ﺟﺮﺏ ﺗﺴﺎﻓﺮ
– ﺍﻧﺎ ﻫﻴﻚ ﻗﻠﺖ . ﺷﻠﺖ ﺣﺎﻟﻲ ﻭ ﺳﺎﻓﺮﺕ ﺍﻟﻜﺮﺍﻣﺔ ﺑﺮﺍ ﺯﻋﺠﺘﻨﻲ ﺍﻛﺘﺮ ..
ﻫﻮﻧﻴﻚ ﺍﻟﻜﻞ ﻋﻤﺒﻴﺬﻟﻨﻲ .. ﻭ ﺗﻌﺎﻣﻠﺖ ﺍﺳﻮﺃ ﻣﻌﺎﻣﻠﺔ
ﺟﻴﺖ ﺍﺷﺘﻐﻞ ﺑﺸﻬﺎﺩﺗﻲ .. ﻣﺎ ﺣﺪﺍ ﺷﻐﻠﻨﻲ .. ﻣﺎ ﺑﺸﻐﻠﻮﻧﺎ ﻧﺤﻦ
ﺭﻓﻘﺎﺗﻲ ﺍﻟﻤﻌﻲ ﺻﺎﺭﻭ ﻳﻠﻔﻮ ﺻﻨﺪﻭﻳﺶ ﻭ ﻳﻘﺒﻀﻮ ٥٠٠ ﺩﻭﻻﺭ ﺑﺎﻟﺸﻬﺮ
ﺑﺲ ﺍﻧﺎ .. ﻛﺮﺍﻣﺘﻲ ﺍﻟﻠﻌﻴﻨﺔ ﻣﺎ ﺳﻤﺤﺘﻠﻲ ﺩﻛﺘﻮﺭ … ﺍﻧﺎ ﺩﺍﺭﺱ ﻭ ﺗﻌﺒﺎﻥ ﻋﺤﺎﻟﻲ ، ﻭ ﻣﺎ ﺧﺮﺝ ﻭﻗﻒ ﻭﺭﺍ ﺳﻴﺦ ﻟﻠﺸﺎﻭﺭﻣﺎ ﺑﺲ ﻭﻻﺩﻱ ﺟﺎﻋﻮ ﻭ ﺍﻧﺎ ﺗﻌﺒﺖ ﺧﻠﺼﻨﻲ ﺍﻟﻠﻪ ﻳﻮﻓﻘﻚ
– ﻃﻴﺐ ﻣﺎﺷﻲ ﻣﺘﻞ ﻣﺎ ﺑﺪﻙ .. ﺑﺲ ﻻﺯﻡ ﺗﻌﺮﻑ .. ﺍﺫﺍ ﻛﺮﺍﻣﺘﻚ ﺭﺍﺣﺖ .. ﻛﺘﻴﺮ ﺻﻌﺐ ﺗﺮﺟﻊ
– ﺍﻧﺸﺎﻟﻠﻪ ﻋﻤﺮﺍ ﻣﺎ ﺗﺮﺟﻊ
– ﻣﺎﺷﻲ .. ﺷﻼﺡ ﻭ ﺗﻔﻀﻞ ﻋﻐﺮﻓﺔ ﺍﻟﻌﻤﻠﻴﺎﺕ ﻟﻨﺸﻮﻑ
……………………………..
– ﻛﻴﻒ ﺣﺎﺳﺲ ﺣﺎﻟﻚ
– ﻣﺎ ﺑﻌﺮﻑ .. ﻣﺎ ﻋﻤﺤﺲ ﺑﺸﻲ
– ﻣﻤﻢ ﻃﻴﺐ ﻫﻠﻖ ﺭﺡ ﺍﻋﻤﻞ ﻛﺎﻡ ﺗﺠﺮﺑﺔ ﻟﻨﺘﺄﻛﺪ ﻣﻦ ﺍﻟﻨﺘﻴﺠﺔ
ﺭﻓﻊ ﺍﻟﺪﻛﺘﻮﺭ ﺍﻳﺪﻭ ﻭ ﺳﻠﺨﻮ ﻛﻒ
– ﺣﺴﻴﺖ ﺑﺸﻲ ؟
– ﻻ
ﺷﺎﻝ ﺍﻟﺪﻛﺘﻮﺭ ﻛﺎﺳﺔ ﻣﻲ ﻭ ﺷﻠﻔﺎ ﺑﻮﺷﻮ
– ﻫﻠﻖ ؟
– ﺍﺑﺪﺍ
– ﻛﻮﻳﺲ .. ﻃﻴﺐ ﻫﻠﻖ ﺭﺡ ﻓﻀّﻲ ﺳﻠّﺔ ﺍﻟﺰﺑﺎﻟﺔ ﻋﺮﺍﺳﻚ .. ﺣﺴﻴﺖ ﺑﺸﻲ ؟
– ﻭﻻ ﺷﻲ
– ﻛﺘﻴﺮ ﻣﻨﻴﺢ .. ﻋﻤﻠﻴﺘﻚ ﻧﺎﺟﺤﺔ .. ﻣﺒﺮﻭﻙ .. ﺻﺮﺕ ﻫﻠﻖ ﻣﻮﺍﻃﻦ ﻃﺒﻴﻌﻲ ﺑﻜﺮﺍﻣﺔ ﻣﻌﺪﻭﻣﺔ ﻭ ﻣﺆﻫﻞ ﺗﻤﺎﻣﺎ ﻟﻠﻌﻴﺶ ﺑﻬﺎﻟﺒﻠﺪ
– ﺩﻛﺘﻮﺭ .. ﺩﻣﻮﻋﻲ … ﺩﻣﻮﻋﻲ ﻋﻤﻴﻨﺰﻟﻮ .. ﻟﻴﺶ ﻋﻤﺒﺒﻜﻲ ﺍﻧﺎ ؟
– ﺍﻧﺖ ﻋﻤﺘﺒﻜﻲ ﻣﻦ ﺍﻟﻘﻬﺮ ﻳﺎ ﺍﺑﻨﻲ ..
ﺣﺘﻰ ﻟﻮ ﻛﺮﺍﻣﺘﻚ ﺭﺍﺣﺖ ، ﻭ ﺣﺘﻰ ﻟﻮ ﺗﻌﻮﺩﺕ ﻋﺎﻟﺬﻝ .. ﺍﻟﻘﻬﺮ ﺟﻮﺍﺗﻚ ﻣﺴﺘﺤﻴﻞ ﻳﺮﻭﺡ ..
ﻫﻠﻖ ﻣﻤﻜﻦ ﺗﺸﺘﻐﻞ ﺷﻮ ﻣﺎ ﻛﺎﻥ
ﺭﺡ ﺗﻄﻨﺶ ﺍﻟﻬﻨﺪﺳﺔ ﻭ ﺗﻘﺒﻞ ﺗﻠﻒ ﺻﻨﺪﻭﻳﺶ
ﻣﻤﻜﻦ ﺗﺎﻛﻼ ﻛﻔﻮﻑ ﻭ ﺭﻓﺲ ﻭ ﺳﺐ
ﺭﺡ ﺗﻮﻗﻒ ﻋﺎﻟﺪﻭﺭ ﻣﺘﻞ ﻏﻴﺮﻙ ، ﻭ ﻣﻴﻦ ﻣﺎ ﺍﺧﺪﻟﻚ ﺩﻭﺭﻙ ﻣﺎ ﺭﺡ ﺗﺘﺎﺛﺮ
ﺻﺮﺕ ﺑﺘﻘﺪﺭ ﺗﺸﻮﻑ ﻭﻻﺩﻙ ﺑﺎﻟﺸﺎﺭﻉ ﻋﻤﻴﺸﺤﺪﻭ
ﻭ ﻣﺮﺗﻚ ﻋﻤﺘﺸﻄﻒ ﺑﻴﻮﺕ ﺍﻟﻐﺮﺏ
ﺭﺡ ﺗﻌﻴﺶ ﺑﺪﻭﻥ ﻛﺒﺮﻳﺎﺀ .. ﺑﺪﻭﻥ ﻋﺰﺓ ﻧﻔﺲ ..
ﺑﺲ ﺭﺡ ﺗﺒﻜﻲ
ﺭﺡ ﺗﻀﻞ ﻣﻘﻬﻮﺭ
ﻭ ﻣﺴﺘﺤﻴﻞ ﺗﻨﺴﺎ
ﻳﻠﻲ ﻋﺮﻑ ﻃﻌﻤﺔ ﺍﻟﻜﺮﺍﻣﺔ ﺑﻴﻮﻡ ﻣﻦ ﺍﻻﻳﺎﻡ .. ﺑﻌﻴﺶ ﻛﻞ ﻋﻤﺮﻭ ﻣﻘﻬﻮﺭ ﻋﻜﺮﺍﻣﺘو ﻳﻠﻲ ﺭﺍﺣﺖ .. !!
منقول
