خمس الساده وفائض القيمه
سرمد علي الجراح
هنالك معركه حامية الوطيس بين المعلمَيْن الاستاذين يعقوب ابراهيمي وحسين علوان حسين, وكذلك جمهور من الاخوات والاخوه المعلقين, حول تفسير أيات رأس المال (المال هنا ليس مايرد باللهجه العراقيه كناية عن العضو الجنسي, جان صار خوش رأس مال) للخليفه الراشد كارل بن ماركس الزنديق عليه السلام
وبما إن رأس المال حمالة أوجه, ولا يمسه إلا المطهرون, كما صرح بذلك الصحابي الجليل معمر القذافي اللي راحلكم فدوه
فلذلك آليت أن أنأى بنفسي عن هذه المعمعه
ولكني هنا أود أن أسأل كل الراسخين في العلم والمتبحرين في فائض القيمه والتمن, هل توقع ابن ماركس أن يكون لخمس الساده تأثير ضاهر أو باطن على فائض القيمه والهريسه؟
وهل توقع السيد كارل هو أو ربه عندما كتب كتابه المقدس, أن سيأتي في بلد مثل العراق أناس, ينتجون فائض قيمه, بدون ايدي عامله او اله او مواد اوليه؟؟ يبيعون جنه مو ملكهم ومحد شافها, ولو يجي ماركس و أجداده مايعرفون سعر الكلفه مالتها شكد!!
لا وشلون فائض قيمه يقبضون, لافلس ولافلسين!!
زين إذا إنته رأسمالي أو رأسمالك – حتى ماتزعلون- وبالعراق, شلون تحسب سعر الكلفه حتى تكدر تحدد فائض القيمه؟
قصدي أكو معادله رياضيه علميه تكدر تغطي هيج بلد؟
خلي نجي على كل الفقرات وحده وحده
الايدي العامله: لو نسميها الايدي اللطامه هوايه أحسن!! شلون يكدر صاحب العمل يحسب ساعات العمل وبالشهر أكو خمسه وثلاثين يوم عطله
الطاقه: لك هلو عيني, لو يشغل المعمل على ض…ط زوار العتبات المقدسه, أحسن هوايه من كهرباء حكومة المالكي
المواد الاوليه: هاي الوحيده متوفره إذا عندك دولارات بالخارج وتستورد من ايران
كل هذه الكلف لاتشكل خمسه بالميه من سعر الكلفه النهائي!!
لأن يجب عليك أن تحسب الرشاوي والعمولات والأتاوات والخاوات وكعدات الكاوليه والحشيش, التي ستدفها لكل المخلوقات التي تصادفها في طريقك, وحتى من لاتصادفه من المسؤولين, أو أي مخلوق فضائي مر بالصدفه فوق سماء العراق, وحتى القطط والكلاب السائبه أو أعضاء جيش الطرشي
ثم بعد ذلك عليك أن تحسب خمس الساده من السعر أعلاه, زائد فائض التشريب
الخلاصه يا أخوان نحن على بعد ملايين السنين الضوئيه عما تحدث به الحاج ماركس, فلماذا هذه الدوخه؟
لكن هنالك طريقه سهله لاستحصال فائض الهبيط, بدون تعب واسرع من عفريت سليمان اللي جاب عرش بلقيس برمشة عين
هذه الطريقه تعتمد على موهبتك في اللواكه وقدرتك على رؤية الغنيمه عن بعد, وشم الدسم بأنف خارق الحساسيه كما فعلت السيده سندس عمر علي!!
وللتعريف بسيادتها, فهي سعادة سفيرة العراق الفائض كليا عن أي قيمه!!, في مملكة النرويج
فقد نشرت الصحف في النرويج خبرا مفاده إن سعادة السفيره اشترت فيلا بسعر ثمانية ملايين دولار والدفع نقدا!!
يقال عندما اخبرت أحد أقاربها الحفاي بأنها اشترت الفيلا. تعجب وقال لها: بشرفك؟؟
فقالت: لعد بعربانة اللبلبي مال الخلفك!!
سفيره من سنتين وتوصل هيج مواصيل!!
عمي انتي تنطين دروس بالاقتصاد لماركس وكنز, وياريت ادخل على ايدج دوره و إلج خمسين بالميه من فائض اللفط
هذا (المال) اللي يشتغل عدل وبيه حظ!!
مو المساكين يعقوب وحسين وسرمد اللي كضوا عمرهم بين الكتب ودوخة (الراس) الى ان راح (المال)
مع اعتذاري للأساتذه الكرام
الرابط ادناه للخبر المنشور في الجريده النرويجيه
http://www.budstikka.no/%C3%B8konomi-bolig/iraks-ambassador-kjoper-luksusvilla-i-berum-for-45-2-mill-1.7358977
سرمد الجراح
s.aljarra7@gmail.com
