Salwa Zakzak
مبارح بكراجات الست .الدنيا مسا وكلو مبيت وراجع عبيتو.بياع البقدونس الختيار ويللي ايديه يابسين و مليانين جروح وضهرو محني عم ينادي الخمسة ب١٠٠.حتى الزعتر الأخضر والنعنع بنفس السعر مع انو عادة أسعارهم دبل وأكتر…
المهم قربت واشتريت خمسة نعنع..بلش يقللي خدي زعتر.خدي بقلة..وانا عن قللو مو بعازة بس النعنع بتيبس..حاولت اعطيه سعر ٥ جرز بقدونس بدون ما آخدون مارضي وقللي انا بياع مو شحاد..
شافني تلبكت وخجلت وسكتت قام اخد كيس البقدونس من ايدي وعمل تشكيلة بقلة وزعتر ونعنع وبقدونس وقلي الفقرا ما بياكلوا فتوش يعني؟ ودلني عست قاعدة عطرف الرصيف وقللي هلق هاتي المية وعطيها ياهون وخدي هي قرصين بندورة وقليلها هدول من أبو عبدو..
وانا متل الحبابة رحت وعطيتها ياهون وبلغتها رسالة ابوعبدو وتشكرتو كتير وقالتلي مافي منو هالأبوعبدو والله…
يعني دوما بدنا مين يعلمنا ومبارح كان مميز بالختيارية الكدعان والطيبين ..بس حسيت البندورتين رسالة غرامية اكتر من مساعدة وانا كنت المرسال الأجدب..طلعت بلا شكرا ورايحة جاية عم ودي رسايل…