تمانين بالميّة من العلويين مع، و تمانين بالميّة من العلويين ضد..

الله يذكرك بالخير يا زياد الرحباني قبل ما تصير حمار..donkybashar
بأحد مسرحياتو كان يحكي أنّو ٨٠ بالميّة من الشعب اللبناني مع الحرب، و ٨٠ بالميّة من الشعب اللبناني ضدها..

و هيك حكي اليوم السيناريست فؤاد حميرة و بطريقة دراميّة لا تخلو من كوميديا إلهية، مترافقة مع مؤثرات صوتية لعتابا بصوت علي الديك ، و أخرى بصرية لبراميل الموت الطائفية اللي عم تسقط على رؤوس أهالينا :
” تمانين بالميّة من الطائفة العلوية مع الثورة ، بس الحق على المعارضة اللي ما أمّنت الها ظروف مواتية للمشاركة”
هيك حكي فؤاد ، ما جبت شي من بطني..

بس اللي ببطني بدي قولو هلّأ :
– تمانين بالميّة من العلويين مع الثورة ، بس بالصدفة و على غفلة من الزمن و بنفس الوقت تمانين بالميّة من الشبيحة طلعوا علويين ضد الثورة ..
– تمانين بالميّة من العلويين دماءهون فدا الثورة ، بس صادفت انّو تمانين بالميّة من الطيّارين اللي بيرموا البراميل على الناس هنن علويين ضد الثورة..
– تمانين بالميّة من العلويين روحهون مع الثورة ، بس تمانين بالميّة من اصحاب البسطات في سوق السنّة صادفت انهون علويين ضد الثورة ..
– تمانين بالميّة من العلويين قلوبهون مع الثورة، بس بالصدفة كان في تمانين بالميّة علويين بصفوف الكتائب اللي نفّذت مذابح طائفية ..
– تمانين بالميّة من العلويين بدهون سوريا حرة، بس ثاءبت انّو تمانين بالميّة من مسؤولين المعتقلات الطائفية من الطائفة العلوية ..
– تمانين بالميّة من العلويين بدهون يخلصو من بشار و عيلتو، بس سبحان الله يومها بالتحديد كان في تمانين بالميّة علويين من اللي صفقوا لتدمير سوريا..
– تمانين بالميّة من العلويين بدهون سوريا ديمقراطية، بس في شي تمانين بالميّة علويين من القناصين اللي عم يصطادوا ولاد البلد..
– تمانين بالميّة من العلويين ضد حكم العائلة الواحدة، بس ما بعرف شو صار يومها بهديك المسيرة المؤيدة ، كان تمانين بالميّة علويين من اللي عم يجعروا ” الاسد او نحرق البلد”..

تمانين بالميّة من العلويين مع، و تمانين بالميّة من العلويين ضد..
ايه شو هالطائفة المعجزة اللي بتعد شي ١٦٠ بالميّة من نفسها ؟؟؟؟؟؟؟

About زياد الصوفي

كاتب سوري من اللاذقية يحكي قصص المآسي التي جرت في عهد عائلة الأسد باللاذقية وفضائحهم
This entry was posted in الأدب والفن, ربيع سوريا. Bookmark the permalink.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.