تعظيم سلام لمقام باشا اردوغان من خزمتجي بشار

بيمر الاسد بتلات مراحل عند كل منعطف تهديدي :
المرحلة الاولى هية مرحلة العنتريات الفارغة و ضرب الايد عالصدر ، و يا ويلو و يا ظلام ليلو اللي بيتجرّأ عالاعتداء على سوريا، و يللي بدّو يتحدى ، هيدي سوريا مين أدّا ، على شويّة أبو عصام ، و شوية بهلوانيات لمعتز ، على كم فتلة شوارب للعكيد بو حافظ..
بتجي المرحلة التانية اللي بتتمثّل بمرحلة الضياع في الخطاب ، و ذلك بعد ما يصير التدخل أمر واقع، فبيدخل حابل الاعلام بنابل التصريحات الرسمية ، و بيصير راس الواحد فينا ما عم يعرف مين اللي يصدّق، فتارةًً بيقولو انهون ما خبرونا قبل الضربة، و تارةً أخرى بيصّرحوا انو يبعتولنا غواب غواب غواب و يطمنونا ، و لو انو عتاب عتاب عتاب لا تحرمونا… و صليني يا عيني، صليني و النبي..
المرحلة التالتة و الاخيرة اللي بيمر فيها النظام بعد الاعتداء على السيادة، فهون الموضوع بيختلف عن المرحلتين السابقتين اللي بيكون فيهون موقف النظام موحّد تجاه الجهة المعتدية كائنة من تكون..
ففي المرحلة التالتة ، تختلف ردة فعل النظام من معتدي الى اخر بحسب لون الشعر و لون العيون و الدين في كثير من الاحوال :
اذا كان المعتدي اسرائيلي، ما بدها شطارة، احتفاظ بحق الرد و اختيار الزمان و المكان المناسبين و دءّي يا مزّيكا ..
و اذا كانت المعتدية اميركا، فهون النظام بيعترف بفارق القوة و بيشلح حالو بين هالرجلين بالخندق الواحد ، على امل يجي الاميركي في لحظة ما يلحمس على راسو اثناء استراحة المحارب من انتهاك السيادة السورية..
اما الشي اللي الكل ناطرو خلال ساعات هوة التدخل التركي، فبعد اتمام المرحلة الاولى بابراز العنتريات ، و التانية بالتشتت و الضياع، الجميع بانتظار المرحلة التالتة من ردود افعال النظام ، و اللي رح تكون عالاغلب و على لسان بشار الاسد :
تحية للجيش التركي العظيم، جيش السلاطين و الامجاد العثمانية ، و الذي بدأ الزحف لتحرير القدس الشريف مستخدماً الاراضي السورية..
تعظيم سلام لمقام باشا اردوغان من خزمتجي بشار..