تسقط سوريا الاسد، و لتحيا سوريا سيدة حرة مستقلة عزيزة

فرح الاسر الاميركية العفوي بعيد الاستقلال

تجمعوا بالآلاف في ساحة المدينة ، اللي حامل أبنو على كتفو ، و اللي جارّة عربية بنتها ، و اللي شاحط كلبو معو ..
آلاف من الناس لابسين بلوز بألوان علم بلادهون، عينهون عالسما ، و قلوبهون عم تنبض مع كل رفّة علم و مع كل صوت فرقعة للألعاب النارية..
بتجي عينك بعين الغريب، بيبتسملك و بيقلّك عيد استقلال سعيد..
لا شفت صور مرفوعة لأوباما، و لا لافتات معلّقة و مكتوب عليها الكلام المقدس لأوباما..
مشهد مبارح من احتفالات الشعب الاميركي بعيد الاستقلال خلاني اعرف تماماً سبب حزني..

ما في عيلة في سوريا ما رحلها شهيد ، و لا في بيت الا عندو معتقل، و لا في حارة من مدننا الا اكتر من نص بيوتها مهجورة و سكانها بمعسكرات اللجوء..
عالرغم من هالوجع ، الا انو ما هوّة سبب وجعي الحقيقي..

بدي بلد احتفل بعيد استقلالو..
بدي بلد افتخر بألوان علمو..
بدي بلد ارتجف لما اسمع نشيدو الوطني..
بدي بلد حس حالي فيه مواطن مو مستوطن..

باختصار بدي بلد الو اسم ، بس ما الو كنية..

تسقط سوريا الاسد، و لتحيا سوريا سيدة حرة مستقلة عزيزة عاصمتها دمشق ، و حدودها موحدة من شمالها لجنوبها، و من شرقها لساحلها..

لا للتقسيم ، نعم لاستقلال سوريا من أقذر احتلال ..