بيسموه نعوم تشومسكي العرب

Eiad Charbaji
 في شيخ جامع فلسطيني اسمو بسام جرار متخصص بالتحليل الجيوسياسي التاريخي السيسيولوجي، بالإضافة طبعا لشهادات الدكتوراه التي يحملها في أحكام الطهارة والغسل وهالشغلات.
الشيخ بيقدم حالو على انو باحث ومحلل، ومصادرو البحثية هي أوراق الروزنامات وكم مقالة صحفية قرأهن بجريدة الوطن الفلسطينية وعالشريط الاخباري للفضائيات، ومن شان ما نظلمو يمكن قاري كتاب الدكتور مصطفى طلاس “بروتوكولات حكماء صهيون” . بيخبطهن كلهن بالخلاط وبيطلع معو نتائج رهيبة تعتبر فتحا في علم التحليل السياسي. بيقعد على كرسي بنص الجامع وبيتحلقوا حولو طلبة العلم وبيصوروه وليسجلو ملاحظات وبيتلقفو من علومو وتحليلاتو العميقة، ولديه عشرات ألوف المتابعين على وسائل التواصل الاجتماعي، بيتناقلو محاضراتو هيك (بسام جرار يكشف-بسام جرار يفجر مفاجأة- بسام جرار يضع النقاط على الحروف ) ويحصل هو بالمقابل على آلاف شهادات التزكية الاكاديمية المعتبرة من نمط (بارك الله فيك- فتح الله عليك-كتبها الله في ميزان حسناتك) أي نعم.
الحقيقة محاضراتو تفيض بالعلم والمعرفة، شي كيف ستنهار إسرائيل ويتخبو اليهود خلف شجر الغرقد، على نظرية التطور ماسونية صهيونية منشان يخبو اليهود حقيقة ان الله مسخهن لقرود، على كشف حقيقة آل سعود، على أوباما شيعي ويتبع الولي الفقيه، على ميركل تقود مشروع تنصير للمسلمين، على سورة الحشر تتحدث عن ترامب.
كلو هالحكي ماشي… بس المصيبة انو في مجموعة من الناس من اللي بتسمعلو وبيتناقلو فيديوهاتو بيسموه (نعوم تشومسكي العرب ) اي والله…. في واحد كمان عميعيرنا فيه، انو خسارة فينا هيك رجل الله فتح عليه، وإسرائيل عمتدفع ملايين الدولارات لتحذف فيديوهاتو عاليوتيوب، وتحت العامود في لمبة وتحت العامود في لمبة، فوق اللمبة في عامود بالليل يا دادا بالليل