بيت ستي هو الدير الّي علمني انه ربنا موجود و المعجزات موجودة

ربيت ببيت ستي ..
ستي انسانة ندر وجودها من اكثر من الف سنة ، كانت من الارمن الي هجرهن الاتراك و اضطروا يشيلوا ال يان من اخر كنيتهن وعاشوا بسوريا .. هالمرأة رغم بساطتها و فقرها و قلة كلامها الا انها كسرت عندي ( الّي بيقولوا عنه ( مثل اعلى ) )
بيتها فقير كتير و لكن نضيف كتير و مرتب بطريقة عجيبة و بهالقصة فهمت انه جمال بيت الاثرياء ما بيدل عكمال اصحابه .
علماً انها ما بتعرف تصلي و لكن حياتها كلها ترنيمة صلاة .. متقشفة بأكلها وكأنه عندها ندر او صوم ابدي ، كنت شوف الراهبات و الكهنة مدلعين حالهن بالرفاهيات مقارنة بحياتها وهون كسرت عندي قدسية رجل الدين لانه القداسة بالثوب الفقير مو بثوب الكهنة .
رغم فقرها و لكن مابتذكر انها اشتكت او قالت ماعندي ، كنا نطلب ناكل انا ورفقاتي يلي يومياً عم نلعب بالشارع قدام بابها و كانت تجبلنا صندويشات ( مي و زعتر ) وكانوا اهالي رفقاتي يتفاجئوا انه كيف الاولاد عم يحبوا هالصندويشة وهن ممقرفين بالبيت ، اذا طلبنا بوظة مابعرف كيف كانت تحط سكر و ملح الليمون مع المي و كيف تدق التلج و تحولهن ( سموثي ) و لليوم ما دقت اطيب من اكلها و فنونها .
بهالحرب بقيت ببيتها بوقت مدينتها هي مدينة الدمار و التفجيرات بامتياز و مثل ما قضت عمرها تقلّع الجمعيات و المنظمات و رجال الدين من الباب كمان بالحرب قلعتهن ( كنا نفتكرها غلط وانه لازم المحتاج ياخد ، طلعت هي الصح بدها تحافظ علقمتها نضيفة من مال الحرام )
طبعاً قصة ستي ما بتعنيكن و لا بتعرفوها خبرتكن عنها لانه جارها مبارح حكالي عن اخر تقليعة اكلينها جمعية منها كانوا جايبينلها مساعدة ، وفرحت من قلبي رغم ألمي انه هالمرأة اذا بتموت ما بتقبل تاخد شي ولا حتى من اخواتها .
حياتي مع هالمرأة علمتني :
( ساعد الفقراء لانه ربنا بيسمع صوت وجعهن و تنهيدتهن اكثر من غيرهن ، و انه ‫#‏الفقير_الحقيقي_غني_جداً_بالروح‬ وولا ممكن يتكل الا عخالقه ) .
بيت ستي هو الدير الّي علمني انه ربنا موجود و المعجزات موجودة .. عندها تعلمت المعنى الحقيقي ل ‫#‏الحلال‬ و ‫#‏الحرام‬ مو الّي خبرونا عنه بكتبهن ، و رغم فئات و طبقات المجتمع الشرقي و الغربي الي قابلتهن بقيت هي بجدارة مثلي الاعلى ..
86 سنة عالنباتات و تزداد جمالاً .. الله يطول عمرها و عمر حبايبكن .