بوست موجَّه للسيدة جيزيل خوري ، و بعرف حق المعرفة انها رح تقرؤوا…
تفاجأت بإعطائك الهواء لواحد من أبناء أكبر مجرمي الحرب في العالم ، ريبال رفعت الأسد ، (شاهد اللقاء على هذا الرابط: ريبال الأسد نجل رفعت الأسد في المشهد) اللي استطاع بمليارات السوريين المسروقة إنّو يقدّم نفسو كواحد من حماة الحرية و الديمقراطية عن طريق استغلال منبر البي بي سي و بث الاكاذيب اللي اتربّى عليها أبناء هالعيلة، و حاول ببدلة الأرماني المغطّاية قذارتو ، إنّو يلمِّع صورة من لا يمكن تلميعهم..
و عليه ..
أطالب بإسمي و بصفتي مواطن سوري لا يملك من هالدنيا غير قول كلمة الحق، أطالب السيدة جيزيل لإعطائي الفرصة بالرد و تفنيد كل كذبة نطق بها المدعو ريبال الأسد من على منبر المشهد ، لعلِّي أستطيع رد اعتبار الآلاف ممن قتلهم رفعت الأسد بدم بارد ، و أعيد قليلاً من حق المرحوم سمير القصير اللي دينو كبير برقبة السوريين..
…….
عاجل :
وفاة عشر سوريين بالسكتة القلبية اثناء مشاهدة خبر عالتلفزيون يتحدث عن مصرع خمسة سوريين بالجلطة الدماغية و هم يراقبون عراك بين شابين سوريين على لعبة طاولة، راح الاول فيها مباشرةً ، و التاني تاني يوم في حادث سير مروّع مع تلاتة من أفراد عيلتو كانوا في طريق العودة من مجلس عزاء لشابين سوريين ماتوا غرقاً بعد ان فقدوا خمسة من أفراد عائلاتهم خنقاً و ستة شنقاً و أربعة انتحاراً…
السوري يلاحق الموت ..
