Salwa Zakzak
عجقة كبيرة قدام محل الشاورما، تقولوا مجاعة؟ شابة بسيارة دفع رباعي تنتظر وجبتين مدعومتين.. بيتصلوا فيها رفقاتها تعي دغري رايحين عمطعم الفلاني والوجبتين اندفع حقن وبدن عشر دقايق.. بيجوا بنتين صغار بيبيعوا علكة وبسكوت عم يراقبو كل الزباين وكل الطاولات وكل الصحون حتى عم يراقبوا تمام الناس كيف عم تهرش هالشاورما هرش.
بيقلولها معليش نحنا منستنى ومناخدن؟ بتوافق وبيطلبوا منها تخبر البياع انو الوجبتين صاروا الهن!!! يعني صحيانات عالآخر وحافظين ردات فعل حتى البياع.
بتدور سيارتها وبتمشي ..خلصوا الوجبتين وأخدوهن البنتين..طلبوا رغيفين خبز زيادة..شالوا وجبة عجنب لأمن وأختن بالبيت.. وبلشوا يلفوا السندويش بخبز وياكلوا.. نوّت بسة طعموها وقالولوها بس لقمة.. اكلت من ايد كل بنوتة لقمة
وراحت . تمختر غراب جنبن وصار يصرخ.. سألتني بنت منن خالتو الغراب بياكول لحمة.. قلتلها لا.. اختها قالتلها انبلى بياكول ! بعدين مو حرام تطعميه خبزة حاف.. وكمان كل ايد طعمتو لقمة وراح متل الشاطر…
ضبوا صحنن.. حطوه بالحاوية وفي شي عوجوهن ما لو اسم.. كانت الكبيرة عم تقول للصغيرة هلق بس امك وأختك يخلصوا أكل منساوي بريق شاي قد راسك… وضحكوا وراحوا… ويا قلبي