Ricardo Bassous
زوجة فارس الشهابي تنتخب بشار الاسد في لبنان
– بدي تستأصلي كرامتي
– كرامتك ؟
طلع الدكتور بالمريض باستغراب
– ايه كرامتي .. مو انت دكتور جراح و اشطر واحد بالبلد بمعالجة الأورام الخبيثة ؟
– ايه بس
– دكتور .. صدقني ما في اوسخ و اخبث من الكرامة .. و انا كرامتي كتير عالية
– طيب حكيلي شو عمتحس ..
– مشكلتي اني عمحس .. ما عاد بدي حس .
جوا البلد الكرامة مؤلمة دكتور
انا مهندس و انخربت عيشتي بالحرب ،
وكرامتي ما عمتخليني مد ايدي لحدا مشان طعمي عيلتي
كرامتي ما عمتخليني اشتغل حمّال
بيتي راح ، و كرامتي ما عمتسمحلي انزح عند حدا و صفيت بالشارع
كرامتي ما عمتسمحلي اقبل مساعدات
وقفت ساعة عالدور لعبي تنكة مي مبارح ،
اجا واحد خرية كبيرة وقف قدامي بلا دور و عبا عشر بيدونات
كرامتي صارت تنخزني
صرخت و عيطت
اكلتا سب و كف و كرامتي صارت بالاراضي و لهلق عمبرجف من القصة
– العمى كرامتك كتير متضخمة يا ابني ، بجوز تكون ملتهبة ، بس هاي ظروف البلد .. جرب تسافر
– انا هيك قلت . شلت حالي و سافرت
الكرامة برا زعجتني اكتر ..
هونيك الكل عمبيذلني .. و تعاملت اسوأ معاملة
جيت اشتغل بشهادتي .. ما حدا شغلني .. ما بشغلونا نحن
رفقاتي المعي صارو يلفو صندويش و يقبضو ٥٠٠ دولار بالشهر
بس انا .. كرامتي اللعينة ما سمحتلي دكتور … انا دارس و تعبان عحالي ، و ما خرج وقف ورا سيخ للشاورما
بس ولادي جاعو
و انا تعبت
خلصني الله يوفقك
– طيب ماشي متل ما بدك .. بس لازم تعرف .. اذا كرامتك راحت .. كتير صعب ترجع
– انشالله عمرا ما ترجع
– ماشي .. شلاح و تفضل عغرفة العمليات لنشوف
……………………………..
– كيف حاسس حالك
– ما بعرف .. ما عمحس بشي
– ممم طيب هلق رح اعمل كام تجربة لنتأكد من النتيجة
رفع الدكتور ايدو و سلخو كف
– حسيت بشي ؟
– لا
شال الدكتور كاسة مي و شلفا بوشو
– هلق ؟
– ابدا
– كويس .. طيب هلق رح فضّي سلّة الزبالة عراسك .. حسيت بشي ؟
– ولا شي
– كتير منيح .. عمليتك ناجحة .. مبروك .. صرت هلق مواطن طبيعي بكرامة معدومة و مؤهل تماما للعيش بهالبلد
– دكتور .. دموعي … دموعي عمينزلو .. ليش عمببكي انا ؟
– انت عمتبكي من القهر يا ابني ..
حتى لو كرامتك راحت ، و حتى لو تعودت عالذل .. القهر جواتك مستحيل يروح ..
هلق ممكن تشتغل شو ما كان
رح تطنش الهندسة و تقبل تلف صندويش
ممكن تاكلا كفوف و رفس و سب
رح توقف عالدور متل غيرك ، و مين ما اخدلك دورك ما رح تتاثر
صرت بتقدر تشوف ولادك بالشارع عميشحدو
و مرتك عمتشطف بيوت الغرب
رح تعيش بدون كبرياء .. بدون عزة نفس ..
بس رح تبكي
رح تضل مقهور
و مستحيل تنسا
يلي عرف طعمة الكرامة بيوم من الايام .. بعيش كل عمرو مقهور عكرامتو يلي راحت